Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 266 Hüküm no: 410 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma kalyonları için noksan kalan kerestenin temini İftihârü’l-emâcid ve’l-ekârim câmi‘ü’l-mehâmid ve’l-mekârim el-muhtassu bi-mezîdi inâyeti’l-meliki’d-dâim bi’l-fi‘il Âsitâne-i sa‘âdetimde hâssa bostancıbaşı olan (°) -dâme mecdühû- tevkī‘-i refî‘-i hümâyûn vâsıl olucak ma‘lûm ola ki, inşâallâhu te‘âlâ sene-i âtiyede rûy-ı deryâya ihrâc olunacak Donanma-yı hümâyûnum kalyonları mühimmâtı içün iktizâ eden ecnâs-ı kereste düstûr-ı mükerrem müşîr-i müfahham nizâm vezîrim ve kapudanım paşa -edâmallâhu te‘âlâ iclâlehû- tarafından gelen müfredât defteri mûcebince İznikmid sükkânından kat‘ ve naklolan ecnâs-ı keresteden mâ‘adâ tekmîli için kereste kat‘ı dahi iktizâ etmekle imdi sen ki bostancıbaşı-yı mûmâ-ileyhsin, lâzım gelen ücret-i kat‘ ve nakliyeleri hîn-i teslîmde mübâşir yedinden bi’t-tamâm edâ ve teslîm olunup bir akçeleri ketm olunmamak şartıyla irsâl olunan mühürlü ve nişânlı mevkūfât defteri sûreti mûcebince Üsküdar korusunda kat‘ ve ta‘yîn olunan iskeleye nakl ve vakt ü zamânıyla kabzına memûr olana teslîminde ziyâde dikkat ve ihtimâm edip avk u tehîrden ve bu bahâne ile celb-i mâl için re‘âyâ fukarâsına zulm ü ta‘addîden be-gāyet ihtirâz ve ictinâb eyleyesiz deyü fermân-ı âlîşânım sâdır olmuşdur. Buyurdum ki hükm-i şerîfimle vardıkda bu bâbda vech-i meşrûh üzere şeref-yâfta-i sudûr olan işbu emr-i celîlü’l-şân-ı vâcibü’l-imtisâl ve lâzımü’l-ittibâ‘ın mazmûn-ı itâ‘atimizle âmil olup hilâfıyla vaz‘ u hareketden be-gāyet ihtirâz ve ictinâb eyleyesin, şöyle bilesin, alâmet-i şerîfe i‘timâd kılasın. Li-sene tis‘a ve ışrîn ve mi'e ve elf. Elvâh-ı karaağaç kalyon 100 aded Mavla? karaağaç 14 aded Haçlık karaağaç kalyon 68 aded Manuvile argad kalyon 60 aded Argad kalyon 3 aded Dümen kalyon 2 aded Eğer? ve eğirmen? kalyon 72 aded Preçol-ı kebîr 40 aded