Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 267 Hüküm no: 411 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma kalyonları için gerekli kerestenin kestirilerek ücretlerinin tam olarak ödenmesi Şerî‘at-şi‘âr ve fazîlet-disâr Üsküdar kādısı efendi -zîde fezâiluhû- huzûr ba‘de’t-tahiyye ve’t-teslîm inhâ olunur ki, bâ‘is-i mektûb inşâallâhu te‘âlâ sene-i âtiyede rûy-ı deryâya ihrâc olunacak Donanma-yı hümâyûn kalyonları mühimmâtı içün iktizâ eden ecnâs-ı kereste sa‘âdetlü paşa hazretlerinin Ordu-yı hümâyûna gönderdiği müfredât defteri mûcebince İznikmid cânibinden kat‘ ve nakl fermân olunan ecnâs-ı keresteden mâ‘adâ İznikmid’e? keresteden kat‘ı dahi iktizâ etmekle tarafından hitâben fermân-ı âlîşân sâdır ve mûcebince işbu mektûb tahrîr ve hâssa hasekilerinden kıdvetü’l-emâsil ve’l-akrân İbrahim Haseki -zîde [kadruhû]- mübâşir ta‘yîn ve irsâl olunmuşdur. İmdi vusûlünde gerekdir ki, sâdır olan fermân-ı celîlü’[l]-kadri vâcibü’l-imtisâl-i itâ‘at mazmûnu ile amel edip zikr olunan kerestenin lâzım gelen ihrâc-ı kat‘iye ve nakliyeleri hîn-i teslîmde mübâşir yedinden bi’t-tamâm edâ ve teslîm olunup bir akçeleri ketm olunmamak şartıyla irsâl olunan memhûr ve nişânlı mevkūfât defteri mûcebince Üsküdar korusundan kat‘ ve ta‘yîn olunan iskeleye nakl ve vakt ü zamânında kabzına memûr olana teslîminde ziyâde dikkat ve ihtimâm edip avk u tehîrden ve ihmâl ve müsâmahadan be-gāyet ihtirâz.