Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 267 Hüküm no: 412 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızılada ve Maltepe halkı balıkçılıkla meşgul olduklarından kendilerinden kereste talebinde bulunulmaması Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Üsküdar kādısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki Üsküdar kazâsında vâki‘ Adalar nâhiyesine tâbi‘ Kızılada ve Maltepe re‘âyâsı Dîvân-ı hümâyûnuma arzuhâl edip karyeleri merhûm Şehzâde Sultan Mehmed Han Evkāfı kurâlarından olup re‘âyâsı balıkçı tâifesinden olmağla araba ve devâb ashâbı olmadıklarından mâ‘adâ cezîre-i mezbûrede fundadan gayri nesne hâsıl olmayıp ve bu âna değin nâhiye-i mezbûreden kereste kat‘ı fermân olundukda kereste talebiyle rencîde olunmuş değiller iken bu sene-i mübârekede nâhiye-i mezbûreden kereste kat‘ ve nakl fermân olundukda mücerred ta‘cîz için nâhiye ahâlîsi kereste veriniz deyü rencîde etmeleriyle cezîre-i mezbûrede kereste hâsıl olmadığı nümâyân ve mezbûrlar dahi araba ve devâb ashâbı olmayıp balıkçı fukarâsı olmağla bir vechile kereste kat‘ı mümkün olmadığı nâhiye-i mezbûre nâibi arz etmekle kadîme mugāyir kereste mutâlebesiyle fukarâya rencîde etdirilmeyip men‘ u def‘ olunmak bâbında emr-i şerîf verilmek ricâ eyledikleri ecilden Hazîne-i âmire’mde mahfûz olan mevkūfât defterlerine nazar olundukda, nâhiye-i mezbûrun Üsküdar korusu kerestesini kat‘ edegelen nevâhîlerden olup Üsküdar korusundan bir mikdâr ecnâs-ı kalyon kerestesi fîleri üzere kat‘ ve nakleylemek üzere emr-i şerîf verildiği derkenâr olunmağın imdi bu vakte dek verdikleri olmamağla fîmâ-ba‘d dahi mutâlebe ile remîde olunmayalar deyü fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi mezbûrlar bu vakte değin kereste verdikleri olmamağla hilâf-ı emr ve defter kereste mutâlebesiyle fukarâyı ta‘cîz ve rencîde etdirmeyip emr-i âhar irsâline muhtâc eylemeyesin, şöyle bilesin, alâmet-i şerîfe i‘timâd kılasın. Tahrîren fi’l-yevmi’l-hâdî aşer min-şehri Rebî‘i’l-evvel [sene] selâsîn ve mi'e ve elf. Edirne el-mahrûse. Vasale ileynâ fi’l-yevmi’l-ışrîn min-Rebî‘ülevvel sene 1130