Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 270 Hüküm no: 417 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul'a gidecek samanın temin edilip gönderilmesi Şerâyi‘-i şi‘âr Gekbüze ve Adalar ve Yoros ve Taşköprü ve İznikmid ve Karamürsel ve Yalakâbad ve Pazarköyü ve İznik ve Gemlik ve Mudanya ve Kazıklı kādıları -zîde fazluhum- ve mefâhirü’l-emâsil ve’l-akrân kazâ-i mezbûreler serdârları vekîlleri ve ihtiyârları -zîde kadruhum- inhâ olunur ki, mu‘tâd-ı kadîm üzere kazânızdan kadîmü’l-eyyâmdan berü tarafımıza verilegelen saman ber-mûceb-i memhûr defter işbu sene-i mübârekede tarafımıza irsâl ve naklolması içün işbu mektûb tahrîr ve kıdvetü’l-emâsil ve’l-akrân elli altı bölüğün Veyis Ağa -zîde kadruhû- mübâşir ta‘yîn ve irsâl olunmuşdur. Vusûlünde gerekdir ki, memhûr defter nâtık olduğu vech üzere beher kazâdan nakli iktizâ eden samanı mübâşir-i merkūma teslîm ve sefinelere tahmîl ve bir gün evvel vakt-i zamânıyla Âsitâne’ye irsâl ve teslîm etdirmede her biriniz gereği gibi takayyüd-i tâm ve sa‘y-i ihtimâm edip ammâ bu bahâne ile hilâf-ı şer‘-i şerîf kimesneye gadr ve ta‘addî etdirmeyip mûceb-i mektûb ile âmil olasız ve’s-selâm. Tahrîren fî-Cemâziyelâhire sene selâsîn ve mi'e ve elf. Abdullah, Ağa-yı Yeniçeriyân-ı Dergâh-ı âlî. Defter oldur ki, Anadolu’nun sağ kolunda beher sene mu‘tâd-ı kadîm üzere Dergâh-ı âlî yeniçerileri ağalarına verilen saman beyân olunur. Sene 1130 Kazâ-i Gekbüze 100 kantar Kazâ-i Adalar 60 kantar Kazâ-i Yoros 80 kantar Kazâ-i Taşköprü 100 kantar Kazâ-i İznikmid 200 kantar Kazâ-i Karamürsel 100 kantar Kazâ-i Yalakâbad 50 kantar Kazâ-i Pazarköyü 50 kantar Kazâ-i İznik 100 kantar Kazâ-i Gemlik 70 kantar Kazâ-i Mudanya 120 kantar Kazâ-i Kazıklı 50 kantar Yekûn-ı saman 1.080 kantar Vech-i meşrûh üzere verilegelen saman. yalnız bin seksen kantardır. Abdullah, Ağa-yı Yeniçeriyân-ı Dergâh-ı âlî.