Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 602 Hüküm no: 743 Orijinal metin no: [131b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Abdullah’ın mirasından kız kardeşi Fâtıma’nın hissesi Mahmiye-i İstanbul’da Hobyar mahallesinde sâkine iken bundan akdem vefât eden Râbia bt. Abdullah nâm hâtunun verâseti zevc-i metrûkü Abdurrahman b. Abdullah ile li ebeveyn kız karındaşı Fâtıma nâm hâtuna münhasıra olduğu şer‘an mütehakkik oldukdan sonra mezbûre Fâtıma Hâtun meclis-i şer‘-i şerîf-i enverde müteveffât-ı mezbûrenin terekesine vâzı‘ü’l-yed olan mezbûr Abdurrahman mahzarında üzerine da‘vâ ve takrîr-i kelâm edip mezbûr Abdurrahman mûrisem müteveffât-ı mezbûrenin terekesinden yirmi guruş kabz etmekle hâlâ meblağ-ı mezbûr ile zimmetinde mütekarrir ve ma‘kūdun-aleyh olan dört bin akçe mehr-i müeccelinden bana âid olan nısf hisse-i şer‘iyyemi vermeyip te‘allül eder mezbûr Abdurrahman’a suâl olunup meblağayn-i mezbûreynden hisse-i irsiyyemin alıverilmesi matlûbumdur dedikde gıbbe’s-suâl mezbûr Abdurrahman cevâbında müteveffât-ı mezbûrenin [132a] terekesinden yirmi guruş ahzını ikrâr lâkin müteveffât-ı mezbûrenin zimmetinde mütekarrir olan dört bin akçe mehr-i müeccelinin üç bin altı yüz akçesini hayâtında kendiye edâ ve teslîm edip dört yüz akçesi zimmetinde bâkī kalmışdır deyû ba‘zı nakz-ı müdde‘âsını def‘le mukābele edicek gıbbe’l-istintâk mezbûr Abdurrahman’dan def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf dahi etmemeğin mûcebince meblağayn-i mezbûreynden müdde‘iye-i mezbûre Fâtıma Hâtun’un ber vech-i muharrer nısf hisse-i şer‘iyyesine isâbet eden üç bin iki yüz akçeyi edâ ve teslîme mezbûr Abdurrahman’a tenbîh olunup mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Abdi Çelebi b. Mehmed, Ebûbekir b. Hüseyin, Mehmed b. İdris, Mehmed Efendi el-İmâm, Ahmed Çelebi b. Abdullah, el-Hâc Abdi b. Mustafa.