Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 603 Hüküm no: 744 Orijinal metin no: [132a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Liye bt. Mosi’nin ölen Yani v. Manol’da olan alacağının vârislerinden tahsili Min mümzâtihî Mahrûse-i Galata tevâbi‘inden Ortaköy’de sâkine Liye bt. Mosi nâm yahudiye zâtını ma‘rifet-i şer‘iyye ile ârifân olan sadrî kebîr oğulları Mosi ve Yasef v. İsak nâm yahudiler ta‘rîfleriyle mu‘arrefe oldukdan sonra meclis-i şer‘-i şerîf-i enverde mahmiye-i İstanbul hısnı ebvâbından Fenerkapısı hâricinde sâkin iken bundan akdem hâlik olan Yani v. Manol’ün verâseti zevce-i metrûkesi Eline bt. Yanaki ile evlâd-ı kibârı Kostanti ve Manol ve Dimitraki ve Pilaş ve Maryora ve Ezmerağda[‘ya] münhasıra olduğu şer‘an zâhir ve müte‘ayyin oldukdan sonra hâlik-i mezbûrun terekesine vâzı‘atü’l-yed olan merkūmân Kostanti ve Manol muvâcehelerinde ikrâr ve takrîr-i kelâm edip hâlik-i mezbûr Yani zimmetinde işbu yedimde olan deyn temessükü nâtık olduğu üzre cihet-i karz-ı şer‘îden sekiz yüz elli esedî guruş hakkım olup kable’l-edâ hâlik olmağla terekesinden meblağ-ı mezbûru taleb eylediğimde beynimizde ba‘de’l-münâza‘a muslihûn tavassut edip da‘vâ-yı mezkûrumdan merkūmân Kostanti ve Manol ile beynimizde üç yüz aded fağfurî fincan ve iki yüz yetmiş beş esedî guruş üzerine inşâ-i akd-i sulh olundukda ben dahi sulh-i mezbûru kabûl ve mârrü’z-zikr üç yüz fincanı yedlerinden alıp kabz eyledim meblağ-ı mezbûr iki yüz yetmiş beş esedî guruşu târih-i kitâbdan doksan bir gün tamâmına değin te’cîl edip ziyâdeye müte‘allika âmme-i da‘vâdan hâlik-i mezbûrun veresesini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde mezbûrân Kostanti ve Manol dahi meblağ-ı merkūm iki yüz yetmiş beş guruşu müeccel deynleri olup meblağ-ı mezbûrdan her biri âharın zimmetine lâzım gelen meblağ dahi emr ve kabûlü hâvî kefâlet-i sahîha ile kefîl olmuşdur deyip mezkûre Liye’yi cemî‘ kelimâtında tasdîk ve tahkīk etmeğin işbu vesîka bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mehmed Çavuş Hasköylü, Hasan Çavuş b. Sefer, İbrahim Çelebi b. Sefer, Mustafa Çelebi b. Ahmed, İraki? Reis v. Anastas.