Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 274 Hüküm no: 423 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere çıkacak olan kalyonların leventlerinden firar etmiş olanların bulunarak görev yerlerine ulaştırılması Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Üsküdar kādısı -zîdet fezâiluhû- ve iftihârü’l-emâcid ve’l-ekârim câmi‘ü’l-mehâmid ve’l-mekârim el-muhtassu bi-mezîdi inâyeti’l-meliki’d-dâim hâssa bostancıbaşı olan Halil -dâme mecdühû- ve mefâhirü’l-kuzât ve’l-hükkâm ma‘âdinü’l-fezâil ve’l-kelâm Üsküdar’dan Hendek ve Düzce ve Sapanca ve (°) ve (°) ve (°) varınca yol üzerinde yemîn ve yesârında vâki‘ olan kādılar ve nâibler -zîde fazluhum- ve mefâhirü’l-emâsil ve’l-akrân kethüdâ yerleri ve yeniçeri serdârları vekîlleri ve a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, işbu sâl-i meymenet-iştimâlde Akdeniz cânibine azîmet etmek üzere techîz ve i‘dâd olunan mîrî kalyonlar levendâtı ulûfelerin bi’t-tamâm alıp ve sâir malzemeleri dahi bi’l-cümle görülüp tekmîl olunmuşken levendât-ı merkūmeden vâfir kimesneler memûr oldukları üzere kalyonlar ile rûy-ı deryâya gitmeyip firâr edip ve hâlâ Üsküdar ile Hendek ve Düzce ve Sapanca ve sâir ol havâlîde vâki‘ kasabât ve kurâ ve ba‘zı mahallerde meks ü tavakkuf ve ibâdullâha ta‘addî vü tecâvüz üzere oldukları ihbâr olunup ve ol makūle mîrî kalyonlar levendâtından firâr edenlerin bulundukları mahallerden ihrâcları ve mîrî kalyonlara ircâ‘ları ve hizmet-i memûrelerinde mevcûd etdirmeleri fermânım olmağın imdi siz ki mûmâ-ileyhimsiz, ol makūle mîrî kalyonlar levendâtının firârîlerinden taht-ı kazânızda vâki‘ kasabât kurâ ve sâir mahallerde bulunanların aslâ ve kat‘â meks ü tevakkuf etdirmeyip ve içlerinde bir ferde sâhib çıkılmayıp bulundukları mahallerden cümlesini bilâ-tehîr ihrâc ve bir ân evvel ve bir sâ‘at mukaddem memûr oldukları kalyonlarına varıp hizmet-i memûrelerinde bulunmak üzere ta‘cîl ale’t-ta‘cîl ircâ‘ ve irsâl ve îsâlleri husûsunda her biriniz dikkat-i tâm ve sa‘y-i ihtimâm eyleyip bu emr-i mühimden tehâvün ve taksîrden be-gāyet ittikā eyleyesiz ve lâkin bu husûsu tama‘-ı hâmma ve ahz ü celbe vesîle edinip kalyonlar levendâtına sâhib çıkmayıp adem-i takayyüd ile memûr oldukları kalyonlarına bir ân evvel irsâl ve îsâl olunmakdan ve bu bahâne ile ahâlî-yi vilâyetin kendü hâlinde olanların nüfûs ve emvâline hilâf-ı şer‘-i şerîf dahl ü ta‘arruzdan be-gāyet ihtirâz ve ictinâb eylemeniz bâbında fermân-ı âlîşân sâdır olmuşdur. Buyurdum ki, (°) vusûl buldukda bu bâbda vech-i meşrûh üzere şeref-yâfta-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olup hilâfından gāyetü’l-gāye tevakkī ve ictinâb eyleyesiz, şöyle bilesiz, alâmet-i şerîfe i‘timâd kılasız. Tahrîren fî-evâili şehri Receb sene selâsîn ve mi'e ve elf. Kostantıniyye el-mahrûse. Kad vasale ileynâ fî 9