Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 275 Hüküm no: 424 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızıladalar'da sürgünde bulunan Selanik metrepolidinin affedildiği Selanik metrepolidinin ıtlâk fermânıdır Kıdvetü’n-nüvvâbi’l-müteşerri‘în Üsküdar kazâsı muzâfâtından Kartal nâhiyesinde nâibü’ş-şer‘ olan mevlânâ (°) -zîde ilmuhû- tevkī‘-i refî‘-i hümâyûn vâsıl olucak ma‘lûm ola ki, Selanik metrepolidi olan Agniyos nâm râhib Ordu-yı hümâyûnuma arzuhâl gönderip kendü hâlinde olup kimesneye vereceği olmayıp ve üzerine şer‘an bir nesne sâbit olmuş değil iken bundan akdem ba‘zı ashâb-ı ağrâzın hilâf-ı inhâlarıyla emr-i şerîfimle nâhiye-i mezbûreye tâbi‘ Kızıladalar’a nefy olunduğun bildirip nefyden afv ve sebîli tahliye olunmak bâbında emr-i şerîfim ricâ etmeğin dilediği mahâlde ikāmet etmek üzere nefyden afv olunmak emrim olmuşdur. Buyurdum ki, Dergâh-ı mu‘allâm çavuşlarından kıdvetü’l-emâsil ve’l-akrân Mehmed Çavuş -zîde kadruhû- vusûl buldukda bu bâbda sâdır olan emrim üzere amel dahi râhib-i mesfûr vech-i meşrûh üzere dilediği mahâlde ikāmet etmek üzere nefyden afv olunmağla ada-i mezkûrdan sebîli tahliye eyleyip mazmûn-ı emr-i şerîfimle âmil olasın, şöyle bilesin, alâmet-i şerîfe i‘timâd kılasın. Tahrîren fî-evâili şehri Recebi’l-ferd sene selâsîn ve mi'e ve elf. Be-yurd-ı sahrâ-yı Edirne. Kad vasale ileynâ fî 13