Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 278 Hüküm no: 428 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lefter'in varislerinden Andornike ve Canora'nın aldıkları dükkân karşılığında terekedeki diğer haklarını kardeşleri Vayostalahati'ye verdikleri Medîne-i Üsküdar’a muzâfe Adalar nâhiyesine tâbi‘ Kartal nâm [karye] sâkinlerinden iken bundan akdem hâlik olan Lefter v. Lazari nâm zimmînin verâseti sulbiye kebîre kızı Vayostalahati ile li-ebin kız karındaşları Andornike ve Canora’ya münhasıra ve tashîh-i meseleleri dört sehmden olup sihâm-ı mezbûreden iki sehmi kızı mezbûreye ve bir sehmi mezbûretân Andornike ve Canora’dan her birine isâbeti tahakkukundan sonra mezbûretân Andornike ve Canora taraflarından ber-vech-i âtî ikrâra vekîl olup zât-ı mezbûretânı bi’l-ma‘rifeti’ş-şer‘iye ârifân Pendali v. Acı Zayani ve Kostantin v. Dimo nâm zimmîler şehâdetleriyle şer‘an vekâleti sâbite olan Vartalomoz v. Danyel nâm zimmî meclis-i şer‘-i şerîf-i enverde bi’l-cümle tereke-i hâlik-i mezbûra vâzı‘atü’l-yed olan işbu râfi‘atü’l-kitâb mezbûre Vayostalahati muvâcehesinde bi’l-vekâle ikrâr ve takrîr-i kelâm edip tereke-i hâlik-i mezbûrdan ber-mûceb-i defter-i kassâm müvekkilelerim mezbûretânın hisselerine isâbet ve intikāl eden her birine bin sekiz yüz akçeden ki cem‘an üç bin altı yüz akçe mukābelesinde tereke-i hâlik-i mezbûrdan olup karye-i mezbûrede vâki‘ bir tarafı Ali Ağa mülkü ve üç tarafı tarîk-i âm ile mahdûd bir kıt‘a mülk dükkânı mezbûre Vayostalahati müvekkilelerim mezbûretânın hisse-i mezkûrelerine mahsûb ve takās eylediğinde onlar dahi mukāssa ve kabûl eylediklerinden sonra min-ba‘d tereke-i hâlik-i merkūme ve sâire müte‘allika âmme-i da‘vâdan müvekkilelerim mezbûretân Andornike ve Canora, mezbûre Vayostalahati’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediler dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Şa‘bâni’l-mu‘azzam li-sene selâsîn ve mi'e ve elf. Şuhûdü’l-hâl: Halil Ağa b. Mehmed, Mehmed Ağa b. Hasan zâbit-i Adalar, Diğer Mehmed Ağa b. Ahmed, Diğer Mehmed Beşe b. Ahmed serdâr, İbrahim Çelebi b. Mehmed, Mustafa Çelebi b. Mehmed, İsmail Çelebi b. Şahin, Ahmed Beşe b. Musa, Mehmed Beşe b. Musa, Yanaki v. Andon, Melet v. Sava, Acı Korteş v. Acı Dayani, Mihal v. Dimitri ve gayruhum. Evâhir-i Şevvâl Temme’l-kelâm fî-hâze’l-makām nemekahû el-fakīr İsmail en-nâibü bi-medîneti Adalar -gufira lehû- (Mühür)