Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 277 Hüküm no: 427 Orijinal metin no: [82a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe'nin bahçesini Veliyyüddin Efendi'ye sattığı Medîne-i Üsküdar’a izâfeten Adalar nâhiyesine tâbi‘ Dolayoba nâm karye sâkinlerinden Halil Beşe b. İbrahim Çelebi nâm kimesne meclis-i şer‘-i şerîf-i enverde işbu râfi‘u’l-kitâb fahrü’l-eimme Veliyyüddin Efendi b. Yahya Efendi nâm kimesne mahzarında bi-tav‘ihî ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafı Moravî Mehmed menzili ve bir tarafı müşteri-i mûmâ-ileyh mülkü ve bir tarafı dere ve bir tarafı ba‘zen Mehmed Efendi mülkü ve ba‘zen Karamânîzâde Ahmed mülkü ve ba‘zen tarîk-i âm ile mahdûd bir kıt‘a mülk bağçemi eşcâr-ı müsmire ve gayr-ı müsmiresiyle tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yetmiş beş guruşa müşteri-i mûmâ-ileyh Veliyyüddin Efendi’ye bey‘ ve teslîm ü temlîk eyledikde mûmâ-ileyh dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı merkūm yetmiş beş guruşu müşteri-i mûmâ-ileyh yedinden bi’t-tamâm ve’l-kemâl ahz u kabz eyledim min-ba‘d bağçe-i mahdûde-i mezbûrede ve eşcârında benim kat‘â alâka ve medhalim kalmadı, müşteri-i mûmâ-ileyhin mülk-i müşterâsı ve hakk-ı sırfıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem li-sene selâsîn ve mi'e ve elf. Şuhûdü’l-hâl: Fahrü’l-akrân Mustafa Ağa b. Ahmed zâbit-i Yakacık, Mehmed Efendi b. İbrahim, Ahmed Beşe b. İbrahim Çelebi, Hasan Beşe b. Ahmed, Hüseyin Beşe b. Osman, Ömer Beşe b. Hüseyin, Monlâ Mustafa b. Ahmed, Ali Beşe b. Ahmed, Ahmed Beşe b. el-Hâc Mehmed, Süleyman b. Mahmud, Ali Beşe b. Bali, İsmail Çelebi b. Şahin, Ali Beşe b. Hüseyin ve gayruhum.