Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 280 Hüküm no: 431 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar'daki koru-yı hümayundan ağaç kesilmemesi ve kömür yapılmaması Akzâ kuzâti’l-müslimîn evlâ vülâti’l-muvahhidîn ma‘denü’l-fezâil ve’l-yakīn [râfi‘u] a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Üsküdar kādısı -zîde fezâiluhû- tevkī‘-i refî‘-i hümâyûn vâsıl olucak ma‘lûm ola ki, iftihârü’l-emâcid ve’l-ekârim hâlâ hâssa bostancıbaşı Halil -dâme mecdühû- Südde-i sa‘âdetime arzuhâl edip Üsküdar kazâsına tâbi‘ mîrî koru-yı hümâyûn ber-mûceb-i hatt-ı hümâyûn-ı şevket-makrûn hıfz u hırâset olunup mîrî koru ve kadîmî şikârgâh-ı hümâyûnuma tahsîs olunagelen mahallerden kereste almak ve kömür yakmak için odun kat‘ olunagelip ve bunun gibi etvâr-ı nâ-hemvâre ta‘addî etmemek üzere bostancıbaşı-yı mûmâ-ileyh tarafından bir kaç def‘a tenbîh olundukda ba‘zı kimesneler mütenebbih olmayıp koru-yı hümâyûnum derûnunda olan eşcârı kat‘ ve kömür hark edip ve âlet-i harb ile ta‘addî ve tecâvüz üzere oldukların bildirip bu def‘a dahi koru-yı mezbûrdan kereste ve sâir eşcâr makūlesi kat‘ olunmayıp ve kömür hark olunmamak üzere muhkem tenbîh ve te'kîd olunup ba‘de’t-tenbîh bundan sonra dahi mütenebbih olmayıp şer‘-i şerîf ve emr-i hümâyûnuma muhâlif koru-yı mezbûrdan kereste ve eşcâr kat‘ ve kömür hark edenler ma‘rifet-i şer‘le teftîş ve tefahhus ve haklarından şer‘le lâzım gelen icrâ olunmak için ism ü resmleriyle ve şöhret-i şi‘ârlarıyla sıhhati üzere Âsitâne-i sa‘âdetime arz u i‘lâm olunmak bâbında emr-i şerîfim ricâ etmeğin vech-i meşrûh üzere amel olunmak bâbında fermân-ı âlîşânım sâdır olmuşdur. Buyurdum ki hükm-i şerîfimle vusûl buldukda bu bâbda sâdır olan fermân-ı celîlü’l-kadrim mûcebince amel edip dahi sen ki mevlânâ-yı mûmâ-ileyhsin bu def‘a dahi koru-yı mezbûrdan kereste ve sâir eşcâr makūlesi kat‘ olunmayıp ve kömür hark olunmamak üzere muhkem tenbîh ve te'kîd olunup ba‘de’t-tenbîh bundan sonra dahi mütenebbih olmayıp şer‘-i şerîfe ve emr-i hümâyûnuma muhâlif koru-yı mezbûrdan kereste ve eşcâr kat‘ ve kömür hark edenler ma‘rifet-i şer‘le teftîş ve tefahhus ve haklarında şer‘le lâzım gelen icrâ olunmak için ism ü resmleriyle ve şöhret-i şi‘ârlarıyla sıhhati üzere Âsitâne-i sa‘âdetime arz u i‘lâm eyleyip emr-i şerîfim mazmûn-ı münîfi ile âmil olasın, şöyle bilesin, alâmet-i şerîfe i‘timâd kılasın. Tahrîren fî-evâhiri şehri Şevvâl sene 1130 Kostantıniyye el-mahrûse. Kad vasale ileynâ fî 5 Zilka‘de. Hâssa Haseki Süleyman Ağa yediyle vürûd bulup Bâ-fermân-ı âlî