Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 281 Hüküm no: 432 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer için kullanılmak üzere temin edilen bargirlere yolda ücreti karşılığında sürücü, arpa ve saman verilmesi Mefâhirü’l-kuzât ve’l-hükkâm ma‘denü’l-fazl ve’l-kelâm Âsitâne-i sa‘âdetimden Bayındır ve Karacalar ve Karacaviran ve Koçhisar ve Tosya ve Osmancık ve Merzifon ve Amasya ve Turhal’a varınca yol üzerinde vâki‘ olan kādılar -zîde fazluhum- ve mefâhirü’l-emâsil ve’l-akrân a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, işbu sene-i mübârekede vâki‘ sefer-i hümâyûnum için mübâya‘a ve el-yevm mevcûd olan topkeşân ve kaltak bârgirlerinin fîmâ-ba‘d istihdâmına lüzûm olmağla ba‘zı menzilin tevzî‘ ve taksîmi fermânım olmağla gönderilen bârgirler her kangınız[ın] taht-ı kazâsına varıp dâhil olur ise kifâyet mikdârı sürücü ihrâc ve iktizâ eden şa‘îr ve samandan dahi tarafınızdan verilip lâzım gelen bahâları taraf-ı mîrîden verilmek için üzerlerine ta‘yîn olunan mübâşirlerin yedlerinden ma‘mûlün-bih memhûr temessük alıp bârgirleri birbirinize irsâl ve îsâle dikkat ve ihtimâm ve zarûret ve muzâyakalarına bâ‘is olmakdan gāyetü’l-gāye ihtirâz ve ictinâb eylemeniz bâbında fermân-ı âlîşânım sâdır olmuşdur. Buyurdum ki, hükm-i şerîfimle vardıkda bu bâbda vech-i meşrûh üzere sâdır olan emr-i celîlü’ş-şânımın mazmûn-ı münîfi ile amel olup hilâfından be-gāyet ihtirâz eyleyesiz, şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sânî ve’l-ışrîn min-Zilka‘deti’ş-şerîfe sene selâsîn ve mi'e ve elf. Kostantıniyye el-mahrûse. Bârgir aded, 260 Kad vasale ileynâ fî 3 Zilhicceti’ş-şerîfe Mübâşir Şa‘bân Ağa El-Fakīr İsmail el-kādı