Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 282 Hüküm no: 433 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzla'da oturan bir grup zimmi ahalinin Hasbahçe bostancılarına vakfedilmiş nükud vakfından borç aldıkları Medîne-i Üsküdar muzâfâtından Adalar nâhiyesine tâbi‘ Tuzla nâm karye re‘âyâlarından Yanaki v. Andon ve Papa Kostantin v. Yanaki [ve] Yankola v. Yanaki ve Üsküla v. İstidraki ve Dimitri v. [D]imitri ve Dimitri v. Kiryazi v. Yanaki ve Yamandi v. Yolimi ve Tarandafil v. Dimitri ve Franko v. Tari ve Nikola ve Dimitraki v. Nekte ve Savati v. Palaş ve Nikola v. Lambornos ve Anaştaş v. Uskularyos ve Mihal v. İstidraki ve Zenbala v. Dimitri ve Mordi v. Zakiri ve Yanaki v. Peraşkova ve Savati v. Yorgi ve Yogo v. Uskularyos [ve] Mihalaki v. Dimitraki ve Tarandafil v. Yomandi ve Panayot v. Diyomandi ve Kostantin v. Mordi ve sâirleri meclis-i şer‘-i şerîf-i enverde hadîka-i hâssa bostancıları odalarından aşağı oda neferâtları mühimmâtlarına mevkūfe nükūdun bi’l-fi‘il mütevellîsi olan işbu sâhibü’l-kitâb fahrü’l-eşbâh Mehmed Ağa b. Abdullah nâm kimesne mahzarında her birileri ikrâr ve takrîr-i kelâm edip merkūm Mehmed Ağa mütevellîsi olduğu mâl-ı vakf-ı mezbûrdan bi’t-tevliye bize nakid iki bin yüz elli guruş ve sırt samur kürk bahâsından üç yüz yirmi iki buçuk guruş min-haysü’l-mecmû‘ iki bin dört yüz yetmiş iki buçuk guruş nısfı yedi yüz otuz altı guruş bir rub‘ olmak üzere bizlere teslîm ve semen târîh-i kitâbdan bir sene tamâmına değin müeccel ve mev‘ûd olmak üzere istidâne ve iştirâ ve kabz edip meblağ-ı mezbûr iki bin dört yüz yetmiş iki buçuk guruşun ale’l-iştirâki’s-seviyy zimmetimizde vâcibü’l-edâ ve lâzımü’l-kazâ deynimizdir deyü her biri bi’t-tav‘i’s-sâf ikrâr ve i‘tirâf eylediklerinde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Zilhicceti’ş-şerîfe li-sene selâsîn ve mi'e ve elf. Şuhûdü’l-hâl: İmâm Ahmed Efendi b. Mustafa, Ali Beşe b. İbrahim, Halil Beşe b. el-Hâc İbrahim, Mehmed Çavuş b. Hasan, Yusuf Yazıcı b. Osman, Yakacıklı İsmail b. Mustafa Beşe, Mustafa b. el-Hâc İbrahim, fahrü’l-eşbâh Ali Ağa b. Ömer.