Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 284 Hüküm no: 438 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi'nin fırınını Yusuf Ağa Nükud Vakfı'na istiğlâl yoluyla sattığı Medîne-i Üsküdar muzâfâtından Adalar nâhiyesine tâbi‘ Kartal nâm karye mutavattınlarından Yorgi v. Yani nâm zimmî meclis-i şer‘-i şerîf-i enverde medîne-i mezbûrede vâki‘ merhûm Yusuf Ağa nâm sâhibü’l-hayrın nükūd-ı mevkūfesine bi’l-fi‘il mütevellî olan işbu bâ‘isü’l-kitâb el-Hâc Mehmed Efendi b. Mahmud Efendi nâm kimesne mahzarında ikrâr ve takrîr-i kelâm edip emlâkimden olup karye-i mezbûrede vâki‘ bir tarafdan el-Hâc Ali dükkânı ve bir tarafdan el-Hâc Hüseyin Ağa veresesi mülkleri ve iki tarafdan tarîk-i âm ile mahdûd büyût-ı adîdeyi ve berber dükkânını müştemil mülk fırınımı mütevellî-i mezbûr el-Hâc Mehmed Efendi’ye bi-tarîkı’l-istiğlâli’l-âdî iki yüz on beş guruşa bey‘ ve teslîm eylediğimde ol dahi mâl-ı vakf-ı mezbûr ile ber-vech-i muharrer iştirâ ve tesellüm ve kabz ü kabûl eyledikden sonra semeni olan meblağ-ı mezbûr iki yüz on beş guruşu mütevellî-i merkūm yedinden tamâmen ba‘de’l-ahz ve’l-kabz yine mütevellî-i merkūm sâlifü’z-zikr menzil ve fırını beher sene tamâmına değin yirmi altışar buçuk guruş on beşer para ücret ile bana îcâr ve teslîm eylediğinde ben dahi ber-vech-i muharrer istîcâr ve kabûl eyledim dedikde, gıbbe’t-tasdîki’ş-şer‘î mukırr-ı mezbûrun sulbî kebîr oğlu Danyel nâm zimmî asl-ı mâl-ı vakf-ı mezbûra ve derk-i menzil ve fırına tarafeynden emr ve kabûlü hâviye kefâlet-i sahîha-i şer‘iye ile kefîl ve zâmin olmağın mâ-vaka‘a bi’t-taleb ketb olundu. Fî-gurreti Şevvâli’l-mükerrem li-sene ihdâ ve selâsîn ve mi'e ve elf. Şuhûdü’l-hâl: el-Hâc Hüseyin b. Mustafa, Ömer Ağa b. Receb, İbrahim Çelebi b. Ahmed, Celenk Mehmed Çelebi b. Abdurrahman, Hüseyin Çelebi, Hasan Efendi b. Ahmed, el-Hâc Ahmed b. Mehmed, Süleyman Çelebi b. Ali ve gayruhum.