Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 288 Hüküm no: 445 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi'nin Adalar naibliğine tayin edildiği Hüve’l-Mu‘în Yâ Fettâh, Yâ Fettâh, Yâ Fettâh, Yâ Rezzâk, Yâ Rezzâk, Yâ Rezzâk, Yâ Vehhâb, Yâ Vehhâb, Yâ Vehhâb Allâhümme Yâ müfettiha’l-ebvâb iftah aleynâ hayre’l-bâb Yâ kâşife’l-müşkilât Yâ âlime’s-sırri ve’l-hafiyyât Gurre-i garrâ-yı mutallâ ve zîbâ şehr-i Cemâziyelâhire el-vâki‘ fi’l-yevmi Salı sene 1132 Allâhümme ahtim bi-hayri ve’s-sa‘âde İzzet-meâb sâbıkā Karamürsel nâibi Ahmed Efendi -dâme mükerremen- Ba‘de’t-tahiyyeti’l-vâfiye inhâ olunur ki, işbu sene isneyn ve selâsîn ve mi'e ve elf Cumâdelâhiresi gurresinden Üsküdar kazâsına muzâfe Adalar nâhiyesinin niyâbeti tarafımızdan size tefvîz olunmuşdur. Gerekdir ki gurre-i merkūmede nâhiye-i mezkûreye varıp beyne’l-ahâlî icrâ-yı ahkâm-ı şer‘-i âlî etmede teşmîr-i sakk-ı ihtimâm edip câdde-i kānûn-ı şer‘-i nebevîden inhirâf etmeyesiz ve’s-selâm. Hurrire fî-evâhiri Cumâdelûlâ li-seneti’l-merkūme. El-Fakīr Osman el-müvellâ-hilâfeten bi-Üsküdar hâlâ.