Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 287 Hüküm no: 444 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İran'a gidip sonra geri dönecek olan Ahmed Dürri Efendi'ye günlük para verileceği Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ (°) kādısı -zîdet fezâiluhû- ve mefâhirü’l-kuzât ve’l-hükkâm ma‘âdinü’l-fezâil ve’l-kelâm Üsküdar’dan Acem sınırına varınca yol üzerinde vâki‘ olan kādılar -zîde fazluhum- ve mefâhirü’l-emâsil ve’l-akrân voyvodalar ve mukāta‘a emînleri ve kethüdâ yerleri ve yeniçeri serdârları ve a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, hâlâ Devlet-i aliyyemden şıkk-ı sânî defterdârlığı pâyesine mutasarrıf olup mâlik-i memâlik-i İran şâh-ı cem-ünvân tarafına makāsıt? ile memûr olan iftihârü’l-emâcid ve’l-ekârim Ahmed Dürri’ye -dâme mecdühû- yevmiye ikişer bin sağ akçe ta‘yînât bahâsı nüzûl eylediği menâzilden verilmek ehem ve elzem olup kazâ ahâlîlerinin tekâlîflerinden ve tekâlîfi olmayan menzillerde mukāta‘a emînleri tarafından beher yevm verilmek fermânım olmağın imdi mûmâ-ileyh Üsküdar’dan azîmet edip Acem sınırına varınca ve Acem’den avdet edip Üsküdar’a gelince nüzûl eylediği menâzilden yevmî ikişer bin sağ akçeyi ahâlî tarafından tekâlîflerine takās olmak üzere ve tekâlîfi olmayan yerlerde mîrî mukāta‘a emînleri tarafından verdirilip hîn-i hesâbda mukāta‘a emînlerinin ve ahâlî-i vilâyetin tekâlîflerine takās için yedinden memhûr temessük alıp bir dürlü zarûret ve muzâyaka çekdirmemeniz bâbında fermân-ı âlîşânım sâdır olmuşdur. Buyurdum ki hükm-i şerîfimle vardıkda bu bâbda vech-i meşrûh üzere şeref-yâfta-i sudûr olan işbu emr-i celîlü’ş-şân-ı vâcibü’l-imtisâl ve lâzımü’l-ittibâ‘ın mazmûn-ı itâ‘at-makrûnuyla âmil olup hilâfıyla vaz‘ u hareketden be-gāyet ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’s-sâlis ışrîn şehri Recebi’l-ferd li-sene isnâ ve selâsîn ve mi'e ve elf. Be-makām-ı Kostantıniyye el-mahrûse.