Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 291 Hüküm no: 449 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rakka'ya görevli olarak gidecek olan Selman Çavuş'a yolda gerekli kolaylığın gösterilmesi Mefâhirü’l-kuzât ve’l-hükkâm ma‘denü’l-fazl ve’l-kelâm Üsküdar’dan Rakka’ya varınca yol üzerinde vâki‘ olan kādılar -zîde fazluhum- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyet [ve] iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, Dergâh-ı mu‘allâm çavuşlarından kıdvetü’l-emâsil ve’l-akrân Selman Çavuş -zîde kadruhû- hâlâ emr-i şerîfimle Rakka tarafına memûr ve irsâl olunmağla her kangınızın taht-ı kazâsına varıp dâhil olur ise mahfûz ve münâsib mahallere kondurup ve gider oldukda dahi mahûf ve muhâtara olan mahallerde yanına kifâyet mikdârı adamlar koşup emîn ve sâlim birbirinize irsâl ve mahâll-i memûra îsâl edip avk u tehîrden ve ihmâl ve müsâmahadan ve hilâf-ı şer‘ bir ferde zulm ü ta‘addî ve tecâvüzden be-gāyet ihtirâz ve ictinâb eylemeniz bâbında fermân-ı âlîşânım sâdır olmuşdur. Buyurdum ki [hükm-i] şerîfimle vusûl buldukda bu bâbda sâdır olan emrim üzere amel dahi siz ki mûmâ-ileyhimsiz, vech-i meşrûh üzere çavuş-ı merkūm her kangınızın taht-ı kazâsına varıp dâhil olursa mahfûz ve münâsib mahallere kondurup ve gider oldukda mahûf ve muhâtara olan mahallerde yanına kifâyet mikdârı adamlar koşup emîn ve sâlim birbirinize irsâl ve mahâll-i memûra îsâl edip avk u tehîrden ihmâl ve müsâmahadan ve hilâf-ı şer‘ bir ferde ta‘addî vü tecâvüzden ihtirâz ve ictinâb eyleyesiz, şöyle bilesiz, alâmet-i şerîfe i‘timâd kılasız. Tahrîren evâsıt-ı şehr-i Ramazan sene isneyn ve selâsîn ve mi'e ve elf. Kostantıniyye.