Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 292 Hüküm no: 450 Orijinal metin no: [89a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe'nin vefat eden Mustafa b. Mehmed'e borç verdiğine dair gösterdiği şahitlerin yalancı olduğu Soğanlıkī Ahmed b. Mustafa’nın şâhid-i zûr idiğine i‘lâmdır Ma‘rûz-ı dâ‘î oldur ki, Mahrûse-i Üsküdar mülhakātından Adalar nâhiyesine tâbi‘ Soğanlık nâm karye sükkânından iken bundan akdem fevt olan Mustafa b. Mehmed nâm müteveffânın sagīre kızları Esma ve Ümmü Gülsüm ve Fâtıma nâm sagīrelerin kıbel-i şer‘den mansûbe vasiyyeleri olan Âişe bt. Mustafa’dan, Ali Beşe b. İbrahim nâm kimesne târîh-i kitâbdan beş sene mukaddem sagīrelerin babaları Mustafa’ya dört buçuk guruş karz vermiş idim deyü vasiyye-i mersûmeden iddi‘â eyledikde husûs-ı mezkûra şehâdet eden Ahmed b. Mustafa nâm kimesnenin şâhid-i zûr olduğuna Mehmed Çelebi b. Abdi ve Mehmed Beşe b. Ömer nâm kimesneler şehâdet etmeleriyle mersûme Fâtıma inhâsıyla ol ki vâki‘ hâldir, pâye-i serîr-i a‘lâya i‘lâm olundu. Bâkī emr ü fermân men-lehü’l-emrindir. Tahrîren fi’l-yevmi’l-hâmis min-Şevvâli’l-mükerrem li-sene isnâ ve selâsîn ve mi'e ve elf.