Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 295 Hüküm no: 457 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal ve Pendik'te menzil olmadığından kendi işleri için gelip gidenlerin halktan zorla bargir talep etmemeleri, resmi ulakların da ücretini vererek bargir almaları Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Üsküdar’da kādı -zîde fazluhû- tevkī‘-i refî‘-i hümâyûn vâsıl olucak ma‘lûm ola ki Kartal ve Pendik nâm karye ahâlîleri Dîvân-ı hümâyûnuma arzuhâl edip karye-i mezbûrda kadîmden menzili olmayıp vâki‘ olan hazîne ve ulaklar Üsküdar menzilinden binip Gekbüze menziline ve Gekbüze menzilinden binip Üsküdar menziline inip bu ana gelince menzil bârgiri talebiyle rencîde olunageldiğimiz yoğiken şimdi gelen hazîne ve ulaklar karyelerimize gelip müft ü meccânen yiyip ve içip bilâ-fiyat bizlerden bârgir taleb ve bulunmadığı hâlde yirmi beş guruş verin deyü rencîde vü ta‘addî etmeleriyle ta‘addîleri men‘ u def‘ olunmak bâbında emr-i şerîfim ricâsına istid‘â-yı inâyet eyledikleri ecilden Hazîne-i âmire’mde mahfûz olan mevkūfât defterlerine nazar olundukda kadîmden ve hâlâ ta‘yîn-i menzil olmayan kazâlara umûr-ı mühimme ile gidip ve gelip ulak vâki‘ olundukda yazı ve mektûblarına bâ‘is olmak için yedlerinde ücret-i in‘âm menzil fermânların olduğu hâlde dahi yine fermân olunduğu üzere sâ‘at başı onar sağ akçe ücretleri verilmek üzere menzil bârgiri tedârik edip vermeleri için emr-i şerîfim verilegelmekle emr-i hümâyûnum ile giden ulaklara ücret ile bârgir verilip bundan mâ‘adâ kendü emirleri için gelip gidenlere min-ba‘d bârgir verilmemek üzere emr-i şerîf verdiği derkenâr olundu. İmdi derkenârı mûcebince temessük olunmak fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi i‘lâm olunduğu üzere hilâf-ı şer‘-i şerîf ta‘addîleri men‘ ve umûr-ı mühimme ile vâki‘ olan ulakların münkerine bâ‘is olunmamak için ellerinde ücret-i in‘âm fermânları olunduğu hâlde dahi sâ‘at başına onar sağ akçe ücretlerine bârgir tedârik ve süvâr etdirip bundan mâ‘adâ kendü umûru için gelip gidenlere min-ba‘d menzil bârgiri talebiyle fukarâya rencîde vü remîde etdirmeyesiz, şöyle bilesiz, alâmet-i şerîfe i‘timâd edesiz. Tahrîren fî-şehri’s-sâlis aşer Rebî‘ülevvel. Be-medîne-i Kostantıniyye.