Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 298 Hüküm no: 462 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Abdullah'ın terekesinden olan evin satılarak beytülmal hakkının verildiği Medîne-i Üsküdar muzâfâtından Adalar nâhiyesine tâbi‘ Kartal nâm kasaba sâkinlerinden iken bundan akdem vefât eden İbrahim b. Abdullah’ın verâseti zevce-i menkûha-i metrûkesi Meryem bt. Mehmed nâm hatundan gayri zâhirde vâris-i ma‘rûf olmayıp selâse-i erbâ‘ı cânib-i beytülmâle âid ve râci‘ olduğu müte‘ayyen olup kasaba-i merkūmede hâlâ beytülmâl emîni olup tereke-i müteveffâ-yı mezkûr İbrahim’in selâse-i erbâ‘ına bi-hükmi’l-emâne vâzı‘u’l-yed olduğu mütehakkık olan Mehmed Ağa b. el-Hâc Hüseyin meclis-i şer‘-i şerîf-i enverde işbu sâhibeyi’l-kitâb İmâm İsmail Efendi b. Mehmed ile mezbûre Meryem bt. Mehmed nâmân kimesneler mahzarlarında bi’l-emâne ikrâr ve takrîr-i kelâm edip müteveffâ-yı mezbûr İbrahim’in terekesinden olup yine kasaba-i merkūmede vâki‘ olup bir tarafı Şekerci Mehmed Beşe mülkü ve bir tarafı Bilaoğlu mülkü ve bir tarafı Ömeroğlu mülkü ve bir tarafı tarîk-i âm ile mahdûd olup iki bâb fevkānî oda ve bir tahtapûş ve bir mikdâr bağçe ve eşcâr-ı müsmire ve gayri müsmireyi müştemil mülk menzili ânifen zikr olunan vech üzere cânib-i beytülmâle âid ve râci‘ olmağın mecâlis-i tâlibînde ve mecma‘-ı nâs olan sûk-ı sultânîde kirâren ve mirâren nidâ ve müzâyede olundukda bi’l-külliye ragabât-ı nâs münkatı‘ oldukdan sonra meblağ-ı câi’l-beyânda mezkûr İmâm İsmail Efendi ile mezbûre Meryem Hatun üzerlerine karâr edip bir akçe ve bir habbe ziyâde ile tâlib-i âhar zuhûr etmemeğin menzil-i mahdûd-ı mezkûru karâr-dâde olan on beş bin yüz yirmi akçeye mezkûrân İmâm İsmail Efendi ile mezbûre Meryem Hatun ale’l-iştirâki’s-seviyy tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bi’l-emâne bey‘ ü temlîk ve teslîm edip ol dahi ber-vech-i muharrer iştirâ ve temellük ve tesellüm ve kabûl edip semeni olan meblağ mezkûrü’n-na‘t on beş bin yüz yirmi akçeyi emânet-i mahkiyem hasebiyle yedlerinden bi’t-tamâm ahz u kabz edip menzil-i mahdûd-ı mezkûru mahâllinde kabza taslît eyledim, fîmâ-ba‘d menzil-i mahdûd-ı mezkûr mezbûrân İmâm İsmail Efendi ile mezbûre Meryem Hatun’un ale’l-iştirâki’s-seviyy mülk-i müşterâlarıdır, keyfe mâ yeşâ ve yahtâr mutasarrıfân olsunlar dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Tahrîren fi’s-sâbi‘ min-şehri Receb sene selâse ve selâsîn ve mi'e ve elf. Şuhûdü’l-hâl: İbrahim Çelebi b. Mehmed, el-Hâc Ebubekir b. Halil, Halil Ağa b. Mehmed, Serdâr Mehmed Ağa b. Ahmed ve gayruhum mine’l-hâzırîn.