Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 299 Hüküm no: 463 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe'nin kendine ait evdeki hissesini kardeşi Mustafa'ya sattığı Medîne-i Üsküdar’a muzâfe Adalar nâhiyesine tâbi‘ Kavaklı nâm karye sâkinlerinden İsmail Beşe b. İbrahim meclis-i şer‘-i şerîf-i enverde li-ebeveyn karındaşı bâ‘isü’l-vesîka Mustafa Beşe mahzarında ikrâr ve takrîr-i kelâm edip yine karye-i mezbûrede vâki‘ olup benim mülk menzilime muttasıl olup fevkānî bir bâb oda ve bir sofa ve bir kenîfde ola[n] hissemi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Mustafa Beşe’ye on iki guruşa bey‘ [ü] teslîm ve temlîk edip ol dahi ber-vech-i muharrer iştirâ ve temellük ve kabz ve kabûl edip semeni olan meblağ-ı mezbûr on iki guruşu müşteri-i mezbûrun yedinden bi’t-tamâm ahz u kabz edip menzil-i mahdûd-ı mezkûr mezbûr Mustafa Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’l-hâmis min-şehri Recebi’l-ferd sene selâse ve selâsîn ve mi'e ve elf. Şuhûdü’l-hâl: Mahmud oğlu Ali, Çobanoğlu Mehmed b. Ahmed, Bostancıoğlu Mehmed, Halil b. Mehmed, İbrahim b. Mehmed, Kör Hasan Beşe b. Mehmed ve gayruhum min[e’l-hâzırîn].