Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 306 Hüküm no: 471 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Ali'nin, bağını Musa Odabaşı'ya sattığı Medîne-i Üsküdar muzâfâtından Adalar nâhiyesine tâbi‘ Yakacık nâm karye sâkinlerinden Fâtıma bt. Ali tarafından vekîl olup vekâleti Ali Beşe b. Halil ve Mustafa b. Bekir nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Ali b. Ahmed nâm kimesne meclis-i şer‘-i şerîf-i enverde bâ‘isü’l-kitâb Musa Odabaşı b. Mustafa tarafından vekîl-i müsecceli Hasan Beşe b. el-Hâc Mehmed mahzarında ikrâr ve takrîr-i kelâm edip akd-i âti’z-zikrin sudûruna değin yedimde ve taht-ı tasarrufumda mülküm ve hakkım olup karye-i mezbûre bağları hilâlinde Abdurrahman Ağa arazisinde vâki‘ olup bir tarafı Hızıroğlu Mehmed Beşe bağı ve bir tarafı müşteri-i mezbûr bağı ve iki tarafı tarîk-i âm ile mahdûd olup tahmînen iki bin beş yüz çubuk bağını cümle-i tevâbi‘ ve levâhıkı ve kâffeti’l-hukūk ve’l-merâfıkıyla tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Musa Odabaşı’ya kırk guruşa bey‘ ve temlîk edip ol dahi ber-vech-i muharrer iştirâ ve temellük ve tesellüm ve kabûl edip semeni olan meblağ-ı mezbûr kırk guruşu yedinden tamâmen ahz u kabz edip bağ-ı mahdûd-ı mezkûru mahâllinde kabza taslît eyledim, fîmâ-ba‘d bağ-ı mahdûd-ı mezkûr merkūm Musa Odabaşı’nın mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn fî-şehri Zilka‘deti şerîfe li-sene selâse ve selâsîn ve mi'e ve elf mine’l-hicreti men [lehü]’l-izzü ve’ş-şeref. Şuhûdü’l-hâl: İmâm Mehmed Efendi b. Mustafa, Seyyid Hasan Çelebi b. Yusuf, Mehmed Beşe b. Mustafa, el-Hâc Mustafa b. Veli, Hasan Beşe b. Mehmed, Hüseyin Halil b. el-Hâc Mustafa ve gayruhum.