Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 305 Hüküm no: 470 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed'den kalan bağın Hasan Beşe'ye satıldığı Medîne-i Üsküdar muzâfâtından Adalar nâhiyesine tâbi‘ <> Yakacık nâm karye sâkinlerinden iken bundan akdem vefât eden Mehmed b. Abdullah’ın zâhirde zevce-i metrûkesi Fahri Hatun bt. Hüseyin nâm kimesneden gayri vâris-i ma‘rûf olmayıp cemî‘ mâlının rub‘u mezbûreye ve selâse-i erbâ‘ı beytülmâle âid ve râci‘ olduğu müte‘ayyen ve karye-i mezbûrede hâlâ beytülmâl-i âmme ve hâssa emîni olup müteveffâ-yı mezbûr Mehmed’in terekesinin selâse-i erbâ‘ına bi-hükmi’l-emâne vâzı‘u’l-yed olduğu mütehakkık olan fahrü’l-emâsil ve’l-akrân Mustafa Ağa b. Ahmed ile mezbûre Fahri Hatun’un zâtı ba‘de ta‘rîfi’ş-şer‘î meclis-i şer‘-i şerîf-i enverde bâ‘isü’l-kitâb Peyker Hasan Beşe b. Mehmed mahzarında bi’l-emâne ve bi’l-asâle ikrâr ve takrîr-i kelâm edip müteveffâ-yı mezkûr Mehmed’in terekesinden olup yine karye-i mezbûre bağları hilâlinde vâki‘ bir tarafı Süleyman Beşe bağı ve iki tarafı Hacı İsmail bağı ve bir tarafı tarîk-i âm ile mahdûd iki kıt‘a kış bağı cümle tevâbi‘ ve levâhıkı ile ânifen zikr olunan vech üzere mecâlis-i tâlibînde ve mecma‘-ı nâs olan mahallerde nidâ ve müzâyede olundukda bi’l-külliye rağbet-i nâs inkıtâ‘ından sonra meblağ-ı câi’l-beyânda mezkûr Peyker Hasan Beşe üzerinde karâr edip bir akçe ziyâde ile tâlib-i âhar zuhûr etmemeğin bağ-ı mahdûd-ı merkūmu râyic fi’l-vakt karâr-dâde olan doksan guruşa mezkûr Peyker Hasan Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î bi’l-emâne ve bi’l-asâle bey‘ ü temlîk edip ol dahi ber-vech-i muharrer iştirâ ve temellük edip semeni olan meblağ-ı mezkûru bi’t-tamâm yedinden ahz u kabz edip mahâllinde kabza taslît eyledim, fîmâ-ba‘d bağ-ı mahdûd-ı mezkûr merkūm Peyker Hasan Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn fî-şehri Zilka‘de sene selâse ve selâsîn ve mi'e ve elf. Şuhûdü’l-hâl: İmâm Mehmed Efendi b. Mustafa, Yusuf Beşe b. Mehmed, Seyyid Hasan b. Yusuf, İlyas Beşe b. İvaz, İbrahim Beşe b. Yusuf ve gayruhum.