Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 309 Hüküm no: 474 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Efendi'nin Adalar'a naib tayin edildiği Yâ Fettâh, Yâ Rezzâk, Bismillâhirrahmânirrahîm, Rabbi yessir velâ tu‘assir Rabbi temmim bi’l-hayr İzzet-meâb İsmail Efendi el-muvakkar, ba‘de’t-tahiyyeti’l-vâfiye inhâ olunur ki, işbu sene selâse ve selâsîn ve mi'e ve elf Zilhicceti’ş-şerîfesi gurresinden Adalar nâhiyesinin umûr-ı niyâbet-i şer‘iyesi tarafımızdan size tefvîz olunmuşdur. Gerekdir ki gurre-i mezbûrede nâhiye-i merkūmeye varıp beyne’l-ahâlî ale’n-nehci’l-müstakīm icrâ-yı ahkâm-ı şer‘-i kavîm ve vâkı‘a olan mevtâ-yı askeriye muhallefâtı tahrîr ü takvîm ve beyne’l-verese bi’l-farîzati’ş-şer‘iye tevzî‘ ve taksîm edesiz ve’s-selâm. Hurrire fî-evâhiri Zilka‘deti’ş-şerîfe li-seneti’l-merkūme. El-Muhlis Halil el-müvellâ-hilâfeten bi-medîneti Üsküdar.