Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 309 Hüküm no: 475 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi'nin Himmet Ağa'dan alacağı konusunda sulh bedeli karşılığı anlaştığı Medîne-i Üsküdar’a muzâfe Adalar nâhiyesine tâbi‘ Emirli nâm karye sâkinlerinden İmâm Ahmed Efendi b. Sadık nâm kimesne meclis-i şerîf-i lâzımü’t-tevkīrde işbu bâ‘isü’l-kitâb Himmet Ağa b. Mehmed nâm kimesne mahzarında ikrâr ve takrîr-i kelâm edip nâhiye-i mezbûreye tâbi‘ Kartal nâm karye toprağında vâki‘ mutasarrıf olduğum bağlarımın altı sene mahsûlüne mezbûr Himmet Ağa vaz‘-ı yed edip her sene yirmişer guruşdan ki cem‘an yüz yirmi guruş zimmetinde müctemi‘ olmağla bundan akdem taleb ve da‘vâ murâd eylediğimde beynimizde münâza‘ât-ı kesîre vâkı‘a olmuşdu. El-hâletü hâzihî vesâtet-i muslihûn ile yüz on iki guruş üzerine merkūm Himmet Ağa benim ile inşâ-i akd-i sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr yüz on iki guruşu cihet-i karz-ı şer‘îden merkūm Himmet Ağa’ya zimmetimde yüz yirmi guruş deynim olmağla meblağ-ı mezbûr yüz yirmi guruşun yüz on iki guruşunu merkūm Himmet Ağa mahsûb ve takās ben dahi mukāssa ve kabûl edip meblağ-ı bâkī-i mezbûr sekiz guruşu merkūm Himmet Ağa’ya zimmetimde edâsı lâzım deynimdir. Meblağ-ı mezbûr sekiz guruşdan mâ‘adâ husûs-ı mezbûra ve sâire müte‘allika olan âmme-i de‘âvî ve mutâlebât ve eymân [ve] muhâsamâtdan her birimiz âharın dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-gurreti Zilhicce li-sene selâse ve selâsîn ve mi'e ve elf. Şuhûdü’l-hâl: Halil Ağa b. Mehmed, Mehmed Beşe b. Hasan, Mehmed Ağa b. Ahmed, Ahmed Efendi b. Mehmed.