Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 310 Hüküm no: 477 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa'nın yeniçeri serdarı tayin edildiği Şerî‘at-şi‘âr Kartal kādısı efendi -zîde fazluhû- ba‘de’s-selâm inhâ olunur ki, zîr-i hükûmetinizde vâki‘ Dergâh-ı âlî yeniçerileri serdârları olan kıdvetü’l-emâsil ve’l-akrân altmış yedi cemâ‘atin Mehmed Ağa -zîde kadruhû- serdârlığı kemâ-kân ibkā ve mukarrer olmağın işbu mektûb tahrîr ve irsâl olundu, inşâallâhu te‘âlâ vusûlünde gerekdir ki, mûmâ-ileyhi serdârlığı umûrunda kıyâm etdirdip âharı müdâhale etdirmeyesiz, ol tarafda vâki‘ Dergâh-ı âlî yeniçerileri ve cebeci ve topçu ve top arabacısı ve kuloğulları ve gılmân-ı acemî cümlesinin üzerlerine serdâr ve kemâ fi’s-sâbık zâbit bilip sözünden taşra ve re'yinden hâric vaz‘ u harekette bulunmayıp itâ‘at ve inkıyâd üzere olalar ve tarîk-i mezbûrûndan bilâ-vâris-i ma‘rûf fevt olan muhallefât-ı metrûkâtların mûmâ-ileyhe ahz u kabz etdirdip ma‘rifet-i şer‘le sûk-ı sultânîde fürûht ve hâsıl olan nükūdun mümzâ ve mahtûm müfredât defterleriyle taraf-ı beytülmâle irsâl ve îsâl etdirdesiz ve sen ki serdâr-ı mûmâ-ileyhsin, ol havâlîde vâki‘ mukīm ve müsâfir zuhûr eden erâzil ve eşhâsın zabt u rabtlarına ve sükkân-ı beldenin emn ü selâmetlerine bâ‘is hüsn-i müstahsene-i mebrûre vücûda getirmeye mücid ve sâ‘î olup mûceb-i mektûbla âmil olasın. Tahrîren evâhiri şehri Cemâziyelevvel sene ihdâ ve seb‘în ve mi'e ve elf.