Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 311 Hüküm no: 478 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hristodalos'un Pendik'te bulunan evdeki yarı hissesini Lofti'ye sattığı Kartal kasabasında mütemekkin Hristodalos v. Lefter nâm zimmî meclis-i şer‘-i şerîf-i enverde Pendik karyesi mütemekkinlerinden kütüb mütevellîsi işbu râfi‘atü’s-sifr Lofti v. Emtoranos nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup mârru’z-zikr Pendik karyesinde vâki‘ etrâf-ı erba‘ası Kolma menzili ve el-Hâc Ahmed oğlu odaları ve tarîk-i âm ile mahdûd fevkānî bir bâb oda ve tahtında mahzen ve sokak kapısına müştemil bir bâb menzilin nısfı benim ve nısf-ı şâyi‘-i âharı müşteri-i merkūm Lofti zimmînin mülkü olmağla ben menzil-i merkūmda olan nısf hisse-i şâyi‘ayı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm Lofti’ye otuz beş buçuk guruşa bey‘ ve teslîm ve temlîk eyledikden sonra semeni olan meblağ-ı merkūm otuz beş buçuk guruşu müşteri-i mersûm yedinden bi’t-tamâm ve’l-kemâl ahz u kabz eyledim, ba‘de’l-yevm nısf menzil-i mezkûrda benim alâkam kalmayıp merkūm Lofti zimmînin mülkü ve hakk-ı sırfı olmuşdur dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Cumâdelûlâ li-sene ihdâ ve sittîn ve mi'e ve elf. Şuhûdü’l-hâl: Ahmed Efendi kâtib, Mehmed Ağa, Molla Ali Çelebi, Halil b. Abdullah, Lazkari v. Kosta, Dimitri, Kabizioğlu, Hristo v. Todori, Karagözoğlu, Azinoğlu Todoraki.