Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 311 Hüküm no: 479 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstorizi'nin, bağını Pazarcı Kosta'ya sattığı Medîne-i Üsküdar muzâfâ[tından] Kartal nâhiyesine tâbi‘ Pendik nâm karyede mütemekkin İstorizi v. Hristodoli nâm zimmî meclis-i şer‘-i şerîf-i enverde işbu râfi‘u’r-rakīm Pazarcı Kosta v. Yani nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup karye-i mezbûr toprağında Taşağılaltı nâm mevzi‘de vâki‘ etrâf-ı erba‘ası Kosta ve Lazkari bağları ve Bulgaroğlu Osman tarlası ve tarîk-i âm ile mahdûd ve tahmînen beş dönüm hora ve çavuş nâm [bağı] hâzır bi’l-meclis es-Seyyid Osman Ağa’nın müvekkili vasî İsmail Efendi’ye yüz yetmiş guruşa istiğlâlen rehin olmakla rehinden ba‘de’l-fek tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm Kosta zimmîye yüz altmış guruşa bey‘ ve teslîm ve temlîk eyledikden sonra semeni olan meblağ-ı merkūm yüz altmış guruşu mersûm Kosta yedinden bi’t-tamâm ve’l-kemâl ahz u kabz eyledim, ba‘de’l-yevm bağ-ı mahdûd-ı mezkûr, mesfûr Kosta’nın mülkü olup benim kat‘â alâka ve medhalim kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Cumâdelevvel li-sene ihdâ ve seb‘în ve mi'e ve elf. Şuhûdü’l-hâl: Fahrü’l-eşbâh Mehmed Ağa b. Halil, Molla Ali Çelebi b. Hasan, es-Seyyid Osman Ağa b. es-Seyyid Ahmed, Yasakçı Hüseyin b. (°), Aziroğlu Acı Todoraki, Yorgaki v. Kosta, Kondişi v. Kuriş.