Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 312 Hüküm no: 481 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasağa rağmen Kartal'dan başka yerlere un satan Kirkor'un kiracı olduğu dükkândan çıkarılması Der-i devlet-mekîne arz-ı dâ‘î-i kemîne budur ki, medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkin Uncu Kirkor zimmî kasaba-i mezbûrede habbâz tâifesinden müsteciren mütemekkin Yuvan nâm zimmîyi meclis-i şer‘-i şerîfe ihzâr edip nizâm-ı kadîmleri üzere kasaba-i mezbûrede olan habbâz tâifesine verilen dakīk ancak kasaba-i mezbûreye kifâyet mikdârı olmağla nân-ı azîz tabh olunup âhara dakīk fürûht etmek memnû‘ iken kendülere bi’d-defa‘ât kıbel-i şer‘-i enverden tenbîh olundukda mesfûr Yuvan zimmî mütenebbih olmayıp tama‘-ı hâmından nâşî ziyâde bahâ ile âhara dakīk fürûht eder suâl olunması matlûbumdur dedikde gıbbe’s-suâl ber-vech-i muharrer mesfûr Yuvan zimmî dahi ikrâr etmeğin fi’l-hakīka kasaba-i mezbûrede habbâzîne tevzî‘ ve taksîm olunan dakīk ancak kasaba-i mezbûreye kifâyet mikdârı olup fırınlardan âhara dakīk fürûht olunmak hubzun kılletine bâ‘is [ve] mesfûrun itlâf ve izâ‘ati ve muhill-i nizâm olan habâseti zâhire olmağla mesfûr Yuvan zimmî habbâz dükkânından ihrâc olunmak bâbında emr-i âlî istid‘â etmekle vâki‘ hâl bi’l-iltimâs huzûr-ı âlîlerine i‘lâm olundu, emr men-lehü’l-emrindir. Tahrîren fi’l-yevmi’s-sâdis aşer min-Cumâdelâhire li-sene semân ve sittîn ve mi'e elf. El-abdü’d-dâ‘î li’d-devleti’l-aliyyeti’l-Osmâniyye Mehmed Nâfi el-müvellâ-hilâfeten bi-nâhiyeti Adalar