Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 313 Hüküm no: 482 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah'ın Ahmed Ağa aleyhine açtığı tarla davasına mürûr-ı zamandan dolayı bakılamayacağı Ma‘rûz-ı dâ‘î-i Devlet-i aliyyeleridir ki, Medîne-i Üsküdar’a muzâfe Adalar nâhiyesine tâbi‘ Kurd karyesi sâkinelerinden Emetullah bt. Hüseyin nâm hatun meclis-i şer‘-i şerîf-i enverde yine karye-i mezbûre sâkinlerinden Ahmed Ağa b. Hasan nâm kimesne mahzarında takrîr-i da‘vâ edip karye-i mezbûre hudûdunda dâhil beyne’l-ahâlî ma‘lûmü’l-cîrân üç buçuk dönüm mikdârı yerli bağımı târîh-i i‘lâmdan on yedi sene mukaddem fuzûlî zabt etmişdir, mûcib-i şer‘îsini taleb ederim dedikde gıbbe’s-suâl mezbûr Ahmed Ağa cevâbında bağ-ı mezbûra müdde‘iye-i mezbûrenin vâlidesi Alime bt. Mehmed nâm hatun mülkiyet üzere mutasarrıf iken bin yüz elli bir senesi Rebî‘ülâhirinin on dördüncü günü târîhiyle müverrah bir kıt‘a hüccet-i şer‘iye mantûkunca on guruşa bana bey‘ ve teslîm ben dahi iştirâ ve tesellüm eylediğimden sonra müdde‘iye-i mezbûre on yedi sene bilâ-özr sükût edip müdâhale etmemişdi dedikde müdde‘iye-i mezbûre ber-vech-i muharrer ikrâr ve i‘tirâf etmeğin on beş sene bilâ-özr terk olunan emlâk da‘vâsı istimâ‘ memnû‘âtdan olmağla müdde‘î-i mezbûre bilâ-emr bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu, el-emr men-lehü’l-emrindir. Tahrîren fil-yevmi’s-sâmin aşer min-Cumâdelâhire li-sene semân ve sittîn ve mi'e ve elf.