Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 73 Hüküm no: 1 Orijinal metin no: [1a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’in terekesinden öncelikle Babüssaade ağaları ve hane-i seferli vakıflarına olan borcunun tahsili Düstûr-ı mükerrem müşîr-i müfahham nizâmü’l-âlem müdebbirü umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyâni’d-devleti ve’l-ikbâl [müşe]yyidü erkâni’s-sa‘âdeti ve’l-iclâl el-mahfûfu bi-sunûfi avâtıfi’l-meliki’l-a‘lâ Âsitâne-i sa‘âdetimde Sadâret-i uzmâ kāimmakāmı olan vezîrim paşa -edâmallâhu te‘âlâ iclâlehû- ve akzâ kuzâti’l-Müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâi ve’l-mürselîn râfi‘ü a‘lâmi’ş [şerî‘a]ti ve’d-dîn el-muhtassu bi-mezîdi inâyeti’l-meliki’l-mu‘în mevlânâ İstanbul kādısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki Bâbüssa‘âdetim ağaları evkāfı ve Hâne-i seferleri evkāfı mütevellîsi olan [kıdvetü’l-emâsil] ve’l-akrân Osman -zîde kadruhû- rikâb-ı hümâyûnuma arzuhâl edip Dergâh-ı mu‘allâm kapıcıbaşılarından olup (…) b. Ahmed’in Dârüssa‘âdetim ağaları evkāfından yüz elli guruş ve Hâne-i seferli evkāfı malından dahi beş yüz kırk guruş (…) edip edâ eylemeden fevt olmağla mal-ı vakfa küllî gadr ve zarâr olduğun bildirip yedinde olan temessükâtı mûcebince muhallefâtın kabz eden vâris terekesi malından edâ olunmadıkça sâir dâyinleri tarafından rencîde olunmamak bâbında emr-i şerîfim recâ eylediği ecilden imdi mal-ı vakf tahsîl olunmak bâbında fermân-ı âlî-şânım sâdır olmuştur buyurdum ki hükm-i şerîfimle vusûl buldukda bu bâbda sâdır olan emrim üzere [amel] edip dahi evkāf-ı mezbûre malından müteveffâ-yı merkūm Ahmed’in zimmetinde bâkī kalan meblağ-ı mezbûru yedinde olan ma‘mûlün-bih temessükâtı mûcebince muhallefâtını kabz eden vârislerinden şer‘le tahsîl ve mal-ı vakf edâ olunmadıkça sâir borçluları tarafından ber-mukaddem alıver deyü rencîde ve remîde ettirmeyesiz, şöyle bilesiz alâmet-i şerîfe i‘timâd kılasız. Tahrîren fî 28 Zilhicce sene [1]109 Be-yurd-ı Sahrâ-yı Edirne Musahhah kāimmakām fermânıdır. Emr-i şerîf mûcebince teveccüh eden mal-ı vakf ma‘rifet-i şer‘le cümleden mukaddem tahsîl ettirilip kabzını memûr olana teslîm oluna deyü Buyuruldu Fî 6 M sene 1110 [1b] Bu cerîde-i cedîde hâlâ şeref-bahş-ı sadâret-i Rumeli olan a‘lemü’l-ulemâi’l-mütebahhirîn efdalü’l-fuzalâi’l-müteverri‘în yenbû‘ü’l-fezâil ve’l-me‘âlî metbû‘ü’l-efâzıl ve’l-e‘âlî sa‘âdetli semâhetli Mirza Mustafa Efendi hazretlerinin taraf-ı bâhirü’ş-şereflerinden def‘a-i sâniyelerinde mahmiye-i İstanbul’da kassâm-ı askerî olan umdetü’l-müderrisîni’l-kirâm zübdetü’l-mütehakkikīni’l-fihâm fazîletlü el-Hâc Receb Efendi’nin zamân-ı şerîflerinde vâki‘ olan hücec ve defâtir kaydına şurû‘ olunan sicill-i sânîdir vaka‘a’l-bed’ fî gurreti’l-Muharremi’l-harâm li-sene aşer ve mi’e ve elf.