Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 82 Hüküm no: 11 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim Halife’nin oğlu Mustafa’nın azledilen vasisi Mehmed Ağa’nın muhasebesi Mahmiye-i İstanbul’da Ereğli mahallesinde sâkin iken bundan akdem vefât eden İbrahim Halîfe b. Abdullah’ın sulbî oğlu Mustafa nâm sagīrin tesviye-i umûruna vasiyy-i mansûbu olan Mehmed Ağa b. Mustafa gaybet-i munkatı‘a ile gāib olmağla azlolunup yerine kıbel-i şer‘den Çinici el-Hâc Mehmed b. Receb vasî nasb olundukdan sonra vasiyy-i sâbıkın üzerine hasbî nâzırı olan Osman Efendi b. Ömer sagīr-i mezbûrun malını vasiyy-i sâbık Mehmed Ağa ile bir sepet sandık içine vaz‘ ve ma‘an mühürleyip Yeni Bezzâzistân’a vaz‘ etmeleriyle hâlâ vasî olan el-Hâc Mehmed ve nâzırı merkūm Osman Efendi zikr olunan sandığı izn-i şer‘le Yeni Bezzâzistân’dan ihrâc ve meclis-i şer‘a ma‘an getirip içinde zuhûr eden mal ta‘dâd ve tahrîr olundukdan sonra vasiyy-i sâbıkın nâzır-ı mezbûr ma‘rifetiyle târîh-i defter-i kassâm mûcebince bi’l-izni’ş-şer‘î bin yüz üç Recebi’nden bin yüz dokuz Zilhiccesi gāyetine gelince yetmiş sekiz aylık görülen muhâsebesidir ki vech-i âtî üzere zikr olunur. Fî gurreti Muharrem sene 1110 Sagīr-i mezbûr Mustafa’ya babasından ve karındaşlarından ber-mûceb-i defter-i kassâm-ı askerî isâbet edip vasiyy-i sâbıkın kabz eylediği be-hesâb-ı sağ meblağ 55264 akçe Sagīr-i mezbûrun li-ebeveyn karındaşı Abdülvahab nâm gāibe dahi babasından ve karındaşlarından ber-mûceb-i defter-i kassâm isâbet edip vasiyy-i sâbıkın makbûzu olan meblağ 55264 akçe Sagīr-i mezbûrun vâlidesi Emine Hatun nâm gāibeye oğlu Mehmed’den ve kızı Saliha’dan isâbet edip vasiyy-i sâbıkın makbûzu olan meblağ 11016 akçe Sagīr-i mezbûrun li-ümm karındaşı İbrahim nâm gāibe karındaşlarından isâbet edip vasiyy-i sâbıkın makbûzu olan meblağ 11016 akçe [3b] Vasiyy-i sâbıkın müddet-i mezbûrede bâ-ma‘rifet-i nâzır murâbahadan tahsîl ve kabz eylediği meblağ 5739 akçe Vasiyy-i sâbıkın bâ-ma‘rifet-i nâzır menzil icâresinden kabz eylediği meblağ 560 akçe Nâzır-ı mezbûrun Abdülkerim Halîfe’den kabz eylediği murâbaha 2154 akçe Def‘a nâzır kabz eylediği: 756 akçe Yekûn: 2910 akçe Cem‘an yekûn-i meblağ: 141769 akçe Yalnız bir yük kırk bir bin yedi yüz altmış dokuz sağ akçedir. Minhe’l-mesârif: Sagīr-i mezbûr Mustafa’nın müddet-i mezbûrede nafaka-i mefrûzasi’çün nâzır-ı mezbûrun vasiyy-i sâbıkdan kabz eylediği nafaka 17300 akçe Abdülvahab nâm gāib dahi sagīr iken nâzır-ı mezbûrun vasiyy-i sâbıkdan kabz eylediği 6570 akçe Sagīr-i mezbûra isti‘mâl içün defter-i kassâmda hissesine mahsûb olup alıkonulan eşyâları nâzır-ı merkūm kabz edip gayr-ı makbûz-ı vasiyy-i sâbık olan 1478 akçe Gāib-i mezbûr Abdülvahab içün dahi isti‘mâl içün alıkonulup nâzır-ı merkūmun kabz eylediği eşyâ kıymeti meblağ 1478 akçe Nâzır-ı merkūmun sagīr-i mezbûr Mustafa nafakasi’çün Abdülkerim Halîfe’den kabz eylediği meblağ 2152 akçe Def‘aten aldığı: 756 akçe Yekûn: 2908 akçe Harc-ı muhâsebe ve harc-ı hüccet 480 akçe İcâre-i Bezzâzistân ve mesârif-i lâzıme 660 akçe Yekûne’l-ihrâcât: 31874 akçe. Para üç hesâbıncadır. Sahhe’l-bâkī meblağ: 109895 Yalnız bir yük dokuz bin sekiz yüz doksan beş akçedir. Sahhe’l-bâkī-i mezbûr bir yük dokuz bin sekiz yüz doksan beş akçenin doksan beş bin dokuz yüz yetmiş dört akçesi meclis-i şer‘de hîn-i muhâsebede mevcûd bulunup vasiyy-i cedîd kabz edip nâzır-ı mezbûr ile yine Yeni Bezzâzistân’a vaz‘ olunup ve meblağ-ı mezbûrdan on üç bin dokuz [yüz] yirmi akçesi defter-i kassâm mûcebince vasiyy-i sâbıkın makbûzundan noksân geldiği işbu mahalle şerh ve beyân olundu.