Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 90 Hüküm no: 19 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Çelebi’nin varislerinin miras menzil hisselerini Sekbanbaşı Murtaza Ağa’ya sattıkları Husûs-ı âti’l-beyânın mahallinde tahrîri içün bi’l-iltimâs savb-ı şer‘den irsâl olunan Mevlânâ Yahya Efendi b. merhûm Mustafa Efendi mahmiye-i İstanbul’da Süleymaniye mahallesinde Kemer odalarında fahrü’t-tüccâr es-Seyyid Ahmed Ağa’nın menziline varıp zeyl-i sahîfede muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Cezerî Kasım Paşa mahallesinde iken bundan akdem vefât eden merhûm es-Seyyid Mahmud Çelebi b. el-Hâc Mehmed’in verâseti sulbî kebîr oğulları mezbûr es-Seyyid Ahmed Ağa ve es-Seyyid Hüseyin Ağa’ya ve sagīr oğulları es-Seyyid Mehmed ve es-Seyyid Yahya’ya ve kebîre kızı Şerife Zeyneb’e ve sagīre kızları Şerife Râbia ve Şerife Âbide ve Şerife Âişe ve Şerife Hadîce’ye münhasıra olup kable’l-kısme mezbûr es-Seyyid Mehmed dahi fevt olup verâseti li-ebin karındaşları mezbûrûn es-Seyyid Ahmed Ağa ve es-Seyyid Hüseyin Ağa ve es-Seyyid Yahya ve Şerife Zeyneb ve Râbia ve Âbide ve Âişe ve Hadîce’ye münhasıra olup kable’l-kısme mezbûre Hadîce dahi vefât edip verâseti vâlidesi Safiye bt. Abdullah’a ve li-ebin karındaşları mezbûrûn es-Seyyid Ahmed Ağa ve es-Seyyid Hüseyin ve Yahya ve Şerife Zeyneb ve Râbia ve Âbide ve Âişe’ye münhasıra olup kable’l-kısme mezbûr Yahya dahi vefât edip verâseti li-ebin karındaşları mezbûrûn es-Seyyid Ahmed Ağa ve es-Seyyid Hüseyin Ağa ve Şerife Zeyneb ve Râbia ve Âbide ve Âişe’ye münhasıra olup kable’l-kısme mezbûre [6a] Âişe dahi vefât edip verâseti li-ebeveyn kız karındaşı mezbûre Râbia’ya ve li-ebin karındaşları mezbûr es-Seyyid Ahmed Ağa ve es-Seyyid Hüseyin Ağa ve Şerife Zeyneb ve Âbide’ye münhasıra olup kable’l-kısme mezbûre Âbide dahi vefât edip verâseti li-ebin karındaşları mezbûrûn es-Seyyid Ahmed Ağa ve es-Seyyid Hüseyin Ağa ve Şerife Zeyneb ve Râbia’ya münhasıra ve tashîh meselesi bi-tarîkı’l-münâsahati’ş-şer‘iyye dört kere yüz bin ve doksan dört bin iki yüz sekiz sehmden olmağla sihâm-ı mezbûrenin yüz elli üçer bin yedişer yüz <> doksanar sehmi altı mertebede mezbûrân es-Seyyid Ahmed Ağa ve es-Seyyid Hüseyin Ağa’dan her birine ve yetmiş altı bin seki[iz yüz] doksan beş sehmi mezbûre Şerife Zeyneb’e ve yüz iki bin iki yüz kırk beş sehmi sagīre-i mezbûre Râbia’ya ve yedi bin dört yüz seksen sekiz sehmi bir mertebede mezbûre Safiye’ye isâbeti tahakkukundan sonra mezbûrân es-Seyyid Ahmed Ağa ve es-Seyyid Hüseyin Ağa ile zâtları Abdulkadir Çelebi b. Mehmed ve Yusuf b. Abdullah ta‘rîfleriyle mu‘arrefe olan mezbûretân Şerife Zeyneb ve Safiye meclis-i ma‘kūd-ı mezbûrda işbu kitâb-ı sıhhat-nisâbın sâhibi hâlâ sekbanbaşı olan umdetü’l-emâcid ve’l-ekârim câmi‘ü’l-mehâsin ve’l-mekârim Murtaza Ağa b. merhûm Haşim Ağa b. es-Seyyid Ahmed tarafından husûs-ı âti’l-beyânda müseccel vekîli fahrü’l-a‘yân Ahmed Ağa b. Ali mahzarında her biri ikrâr ve takrîr-i kelâm edip merhûm-ı mezbûr es-Seyyid Mahmud Çelebi’nin ile’l-vefât mülk ve hakkı idiği müsbet olup mahmiye-i mezbûrede İskenderpaşa mahallesinde vâki‘ bir tarafdan ba‘zan Ahmed Efendi menzili ve ba‘zan Süleyman Ağa b. Abdullah menzili ve ba‘zan tarîk-i hâs ve üç tarafdan tarîk-i âm ile mahdûd hâriciyede tabaka-i ulyâda altı bâb oda ve dîvânhâne ve kenîf ve vüstâda sekiz bâb oda ve bir sofa ve bir kenîf ve süflâda bir kebîr ahır ve kenîf ve dâhiliye tarafında altı bâb fevkānî harâbe oda ve tahtında bir ahır ve dâhiliyede tabaka-i ulyâda altı bâb oda ve bir sofa ve bir hamam ve bir câmekân ve bir sofa ve vüstâda ( ) bâb oda ve süflâda bir matbah ve bir kiler ve bir matbah ve bir bi’r-i mâ ve kenîf ve zât-ı eşcâr iki bahçe ve iki kârgîr mahzen ve mecrâsıyla üç masura mâ-i cârî ve havluyu müştemil menzilden tashîh-i mezbûr üzere üç yük doksan bir bin dokuz yüz altmış üç sehm-i şâyi‘amızı bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile para üç akçe hesâbı üzere beş yük yirmi üç bin beş yüz <> üç akçeye müvekkil-i müşârün-ileyh Murtaza Ağa’ya bey‘ u temlîk ve teslîm onlar dahi iştirâ ve temellük ve tesellüm ve kabûl eyledikden sonra semeni olan meblağ-ı mezbûru bi-kadri’l-hısâs tamâmen alıp kabz eyledik dediklerinden sonra sagīre-i mezbûre Râbia’nın vasiyy-i muhtârı es-Seyyid Ahmed Ağa vekîl-i mezbûr mahzarında ikrâr ve takrîr-i kelâm edip sagīre-i mezbûrenin menzil-i mezbûrdan hissesini ifrâz mümkün olmamağla bey‘ olunup semeni istirbâh olunmak hakkında nef‘-i mahz olmağla zikr olunan yüz iki bin iki yüz kırk beş sehmi dahi ba‘de’l-müzâyede ve ınkıtâ‘u’r-rağbe semen-i misli olan hesâb-ı mezbûr üzere vesâyetim hasebiyle yüz otuz altı bin dört yüz doksan yedi akçeye müvekkil-i müşârün-ileyh hazretlerine bey‘ u temlîk ve teslîm onlar dahi iştirâ ve temellük ve tesellüm eyledikden sonra semeni olan meblağ-ı mezbûru bi’t-tamâm alıp kabz eyledim ba‘de’l-yevm mecmû‘-ı menzil-i mezbûr müvekkil-i müşârün-ileyhin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû İbrahim b. Mehmed ile meclis-i şer‘a gelip inhâ ve takrîr etmeğin mâ-vaka‘a kayd-şüd Fî 2 Muharrem sene 1110 Şuhûdü’l-hâl: Fahrü’l-a‘yân Ahmed Ağa b. Ali, es-Seyyid Abdülkerim Çelebi b. Selahaddin, Mehmed Efendi Sakızlı, Hammâmîzâde Ahmed Ağa b. Mehmed, İsmail Ağa b. Ahmed, Mehmed Çavuş b. Abdullah, Mehmed Çavuş b. Ahmed.