Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 92 Hüküm no: 20 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Nalıncızade Attar Mustafa’nın çocuklarına Sarıkçızade Attar İbrahim Çelebi’nin vasi ve birkaç kişinin de nazır tayin edildikleri Mahmiye-i İstanbul’da el-Hâc Hasan mahallesinde sâkin iken bundan akdem vefât eden Na‘lıncızâde Attâr el-Hâc Mustafa b. Mahmud’un evlâd-ı sıgārı Âişe ve Emine ve Safiye’nin tesviye-i emrlerine ve vakt-i rüşd ü sedâdlarına varınca babaları müteveffâ-yı mezbûrdan isâbet eden mallarını zabt ü hıfza kıbel-i şer‘den bir vasî lâzım ve mühim olmağla emânet ve istikāmet ile ma‘rûf ve diyânet ile mevsûf ve vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘ zâhir olmağın işbu hâfızü’l-kitâb Sarıkcızâde Attâr İbrahim Çelebi b. Mustafa’yı hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri zikr olunan sagīrlerin tesviye-i emrlerine ve vakt-i rüşd ü sedâdlarına varınca babaları müteveffâ-yı mezbûrdan isâbet eden mallarını zabt ve hıfza vasî ve üzerine Pastırmacı el-Hâc Abdullah b. Cafer’i ve mahalle-i mezbûre ahâlîsinden eş-Şeyh Abdullah Efendi b. Müstakim Efendi’yi ve Yorgancı el-Hâc Ahmed b. Derviş’i ve zikr olunan sagīrelerin akrabâlarından Ömer b. Hüsam’ı ve Osman Ağa b. Hüseyin’i hasbî nâzır nasb ü ta‘yîn buyurduklarında onlardan her biri dahi vesâyet ve nezâret-i mezbûreyi kabûl ve hizmet-i lâzımelerini kemâ-yenbağī edâ ve ikāmete ta‘ahhüd ve iltizâm etmeğin kayd-şüd Fî 9 Muharrem sene 1110 Şuhûdü’l-hâl: es-Seyyid Abdullah Efendi b. Süleyman, Ömer Ağa b. Mehmed, Hüseyin Çelebi b. Mehmed, Hasan Çelebi b. Hüseyin, el-Hâc Mehmed b. Yunus, Mehmed Çelebi b. Hızır, Süleyman b. Abdullah.