Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 98 Hüküm no: 28 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Beşe’nin ortaklarındaki alacağını varisleri adına hanımı Fatıma Hatun’un tahsil ettiği Husûs-ı âti’l-beyânın mahallinde ketb ü tahrîri içün savb-ı şer‘den bi’t-taleb irsâl olunan Süleyman Efendi b. el-merhûm Mehmed Efendi mahmiye-i İstanbul’da Bıçakçı mahallesinde el-Hâc Mehmed b. Musa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûre sükkânından olup bundan akdem garîkan vefât eden Mehmed Beşe b. Mehmed’in verâseti zevce-i menkûha-i metrûkesi Fâtıma bt. el-Hâc Hüseyin’e ve sulbî sagīr oğulları Ali ve Osman’a münhasıra olduğu şer‘an zâhir oldukdan sonra sagīrân-ı mezbûrânın vâlideleri ve tesviye-i emrlerine kıbel-i şer‘den mansûb vasîleri olup zâtı mahalle-i mezbûre sükkânından Abdullah Efendi b. Mehmed ve el-Hâc Hüseyin b. Osman ta‘rîfleriyle mu‘arrefe olan mezbûre Fâtıma meclis-i ma‘kūd-ı mezbûrda işbu ashâb-ı kitâb Halil Çelebi b. Osman ve İsmail Çelebi b. Hüseyin ve İvaz b. Abdullah mahzarlarında ikrâr-ı tâm ve takrîr-i kelâm edip zevcim müteveffâ-yı mezbûr Mehmed Beşe hayâtında mezbûrûn Halil Çelebi ve İsmail Çelebi ve İvaz ile şirket-i inân ile şerîkler olmağla mezbûrlar yedlerinde olan asıl mal-ı şirketden yüz on guruş ve fâideden hâsıl olan kırk guruş ki min-haysü’l-mecmû‘ yüz elli guruş hakkını müteveffâ-yı mezbûr kable’l-ahz fevt olmuşidi el-hâletü hâzihi meblağ-ı mecmû‘-ı mezbûr yüz elli guruşu mezbûrûn bana def‘ u teslîm ben dahi yedlerinden tamâmen alıp kabz eyledim meblağ-ı mezbûrdan mezbûrlar yedlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hüseyin Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd Fî 18 min-Muharrem sene 1110 Şuhûdü’l-hâl: Mehmed Çelebi b. Murad, Mustafa Çelebi b. Mehmed, Halil Çelebi b. İsmail, Ahmed Beşe b. Hüseyin, el-Hâc Süleyman b. Osman, Ahmed Beşe b. Muslu, Hüseyin Çelebi b. Cafer.