Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 97 Hüküm no: 27 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman’ın para vakfının mütevellisi olup vefat eden oğlu Mustafa’nın vakfa olan borcunun terekesinden tahsil edilmesi Mahmiye-i İstanbul’da Altıbohça mahallesinde sâkin iken fevt olan el-Hâc Osman b. İbrahim nâm sâhibü’l-hayrın nukūd-ı mevkūfesine meşrûtiyyet üzere mütevellî iken bundan akdem vefât eden kebîr oğlu el-Hâc Mustafa’nın yerine evlâd-ı vâkıfdan meşrûtiyyet üzere mütevellî olan karındaşı işbu hâfızü’l-kitâb Ahmed Çelebi b. el-mezbûr el-Hâc Osman meclis-i şer‘-i şerîf-i enverde müteveffâ-yı mezbûr el-Hâc Mustafa’nın veresesinden kebîre kızı olmağla terekesine vaz‘-ı yed eden Saliha Hatun tarafından husûs-ı âti’l-beyânın husûmet ve redd-i cevâba müseccel vekîli Veli Efendi b. Mehmed mahzarında bi’t-tevliye üzerine da‘vâ ve takrîr-i kelâm edip vâkıf-ı mezbûr el-Hâc Osman b. İbrahim’in gallesi mahalle-i mezbûrede vâki‘ çeşmenin suyolu mühimmâtına sarfa vakf-ı lâzım ile vakfeylediği dört yüz guruşu müteveffâ-yı [mezbûr] el-Hâc Mustafa zamân-ı tevliyetinde kendi mesârifine sarfla istihlâk edip hattâ hâl-i kemâl-i sıhhatinde asıl mal-ı vakf olan dört yüz guruşu mesârifime sarfla istihlâk <> etmekle zimmetimde cânib-i vakfa edâsı lâzım deynimdir deyü huzûr-ı Müslimînde ikrâr ve işhâd edip cânib-i vakfa dâmin olmadan fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden mahalle-i mezbûre sâkinlerinden Bayram Beşe b. Osman ve Mehmed Çelebi b. Mustafa li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffâ-yı mezbûr el-Hâc Mustafa b. el-Hâc Osman b. İbrahim hâl-i kemâl-i sıhhatinde vakf-ı mezbûra meşrûtiyyet üzere mütevellî iken asıl mal-ı vakfdan makbûzu olan dört yüz guruşu mesârifime sarfla istihlâk etmekle zimmetimde cânib-i vakfa edâsı lâzım deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘î-i mezbûrun husûs-ı mezkûrda sun‘u olmamağla yemîn dahi teveccüh etmemeğin mûcebiyle asıl mal-ı vakf olan dört yüz guruşu mütevellî-i mezbûr Ahmed Çelebi’ye terekesinden edâ ve teslîme vekîl-i merkūma tenbîh birle mâ-vaka‘a kayd-şüd. Fî 5 Muharrem sene 1110 Şuhûdü’l-hâl: Sinan Efendi b. Ali, el-Hâc Mehmed b. İbrahim, İsmail Çelebi b. Osman, Ahmed Çelebi b. Osman, Hasan Çelebi b. ( ), Hüseyin Çelebi b. Hasan, Ahmed Çelebi b. Süleyman, Mehmed Beşe b. Hüseyin.