Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 99 Hüküm no: 30 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’in Bezzaz-ı Cedid mahallesi avarız vakfına olan borcunun terekesinden tahsil edilmesi Husûs-ı âti’l-beyânın mahallinde istimâ‘ ve tahrîri içün savb-ı şer‘-i enverden bi’t-taleb me’zûnen irsâl olunan Mevlânâ Ahmed Efendi b. el-merhûm Mehmed Efendi mahmiye-i İstanbul’da Samanveren mahallesi ahâlîsinden olup bundan akdem vefât eden el-Hâc Mehmed b. Hamuda b. [Mehmed’in] menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Emine Hatun bt. ( ) [ve] sulbî kebîr oğlu Ali’ye ve evlâd-ı sıgārı Mustafa ve Mehmed ve Hadîce ve Emine’ye münhasıra olduğu şer‘an zâhir oldukdan [sonra] mahmiye-i mezbûrede Bezzâz-ı Cedîd mahallesi avârızına mevkūfe nukūdun bi’l-fi‘il mütevellîsi olan hâfızü’l-kitâb mezbûr Ali Çelebi meclis-i ma‘kūd-ı mezbûrda sıgār-ı mezbûrûnun tesviye-i emrlerine vasiyy-i muhtârları olmağla terekesine vaz‘-ı yed eden el-Hâc Ahmed b. Mehmed mahzarında üzerine da‘vâ ve takrîr-i kelâm edip babam müteveffâ-yı mezbûr el-Hâc Mehmed b. el-Hâc Hamuda b. Mehmed hayâtında vakf-ı mezbûrun mütevellîsi olmağla asıl mal-ı vakf-ı mezbûrdan üç yüz [elli beş] guruş ahz u kabz ve malına halt edip hattâ hâl-i kemâl-i sıhhatinde fevtinden iki ay mukaddem vakf-ı mezbûra zimmetinde ol kadar guruş deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden zikr olunan Bezzâz-ı Cedîd mahallesi imâmı Ali Efendi b. el-Hâc Mustafa ve Ahmed Efendi [9a] b. Hasan li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed b. el-Hâc Hamuda b. Mehmed hâl-i kemâl-i sıhhatinde fevtinden iki ay mukaddem vakf-ı mezbûra zimmetimde üç yüz elli beş guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mütevellî-i mezbûrun husûs-ı mezbûrda sun‘u olmamağla yemîn teveccüh etmeyip mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Ahmed Çelebi b. Süleyman ve İbrahim b. Mehmed ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd Fî 22 min-Muharrem sene 1110 Şuhûdü’l-hâl: Ali Efendi b. el-Hâc <> Mustafa, Mustafa Ağa b. Ahmed, Ahmed Efendi b. Hasan, Ramazan Çelebi b. Abdullah, Osman Ağa b. Mehmed, Süleyman Çelebi b. Sinan.