Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 100 Hüküm no: 31 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Osman Ağa’nın, vefat eden Mehmed’e olan borcunun bir kısmını hanımı Sitti Hatun’un ödediğini ispat ettiği Kezâlik akd-i meclis-i şer‘-i şerîf ettikde Galata kazâsı muzâfâtından kasaba-i Fındıklı’da Sultan Süleyman mahallesi ahâlîsinden olup bundan akdem vefât eden Osman Ağa b. el-Hâc Ali’nin verâseti zevce-i menkûha-i metrûkesi Sitti Hatun bt. el-Hâc Hasan’a ve evlâd-ı sıgārı Mustafa ve Ahmed ve Abdullah’a münhasıra olup kable’l-kısme sagīr-i mezbûr Mustafa dahi fevt olup verâseti vâlidesi mezbûre Sitti ile li-ebeveyn karındaşları mezbûrân Ahmed ve Abdullah’a münhasıra olup kable’l-kısme mezbûr Ahmed dahi fevt olup verâseti vâlidesi mezbûre Sitti ile karındaşı mezbûr Abdullah’a münhasıra olup kable’l-kısme mezbûr Abdullah dahi fevt olup verâseti vâlidesi mezbûre Sitti Hatun’a münhasıra olduğu şer‘an zâhir oldukdan sonra müteveffâ-yı mûmâ-ileyh el-Hâc Mehmed b. el-Hâc Hamuda’nın evlâd-ı sıgārı Mustafa ve Mehmed ve Hadîce ve Emine’nin tesviye-i emrlerine vasiyy-i muhtârları el-Hâc Ahmed b. Mehmed meclis-i şer‘-i ma‘kūd-ı mezbûrda zâtı ta‘rîf-i şer‘î ile mu‘arrefe olan mezbûre Sitti Hatun mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mehmed b. el-Hâc Hamuda b. Mehmed hayâtında müteveffâ-yı mezbûr Osman Ağa’ya dört yüz elli guruş ikrâz ve teslîm ol dahi iktirâz ve tesellüm ve kabz ve mesârifine sarfla istihlâk edip mukābelesinde mârrü’z-zikr Sultan Süleyman mahallesinde vâki‘ bir tarafdan Osman Reis mülküne ve bir tarafdan Halime Hatun mülküne ve iki tarafdan tarîk-i âmma müntehî üç bâb fevkānî oda ve bir sofa ve dehliz ve bir matbah ve sundurma ve hadîkayı müştemil mülk menzilini mezbûr el-Hâc Mehmed’e ba‘de’t-tahliye irhân ve teslîm edip yedine bin doksan beş senesi Recebi’nin on ikinci günü târîhiyle müverraha târîh-i mezbûrda Mahmudpaşa nâibi olan a‘lemü’l-ülemâi’l-izâm Abdülhalim Efendi b. Ahmed’in imzâsıyla mümzât işbu hüccet-i şer‘iyyeyi def‘ etmekle meblağ-ı mezbûru vesâyetim hasebiyle terekesinden taleb ederim suâl olunsun dedikde gıbbe’s-suâl Sitti Hatun cevâbında minvâl-i muharrer üzere olduğunu ikrâr edip lâkin zevcim müteveffâ-yı mezbûr Osman Ağa’nın fevtinden sonra meblağ-ı mezbûrun dört yüz on guruşunu bi’d-defa‘ât müteveffâ-yı mezbûr el-Hâc Mehmed b. el-Hâc Hamuda b. Mehmed’e edâ ve teslîm edip hattâ hâl-i marazında fevtinden beş gün mukaddem meblağ-ı mezbûr dört yüz on guruşu ahz u kabz ettiğini ikrâr edip ancak kırk guruş deynim kalmışdır deyü def‘le mukābele edicek müdde‘iye-i mezbûreden vech-i meşrûhuna beyyine taleb olundukda udûl-ı ahrâr-ı ricâl-i Müslimînden müteveffâ-yı mezbûrun kebîr oğlu Ali Çelebi ve babası mezbûr el-Hâc Hamuda li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr hâl-i marazında fevtinden beş gün mukaddem müteveffâ-yı mezbûr Osman Ağa’ya ikrâz eylediği dört yüz elli guruşun dört yüz on guruşunu zevcesi müdde‘iye-i mezbûre Sitti Hatun yedinden ahz u kabz edip ancak zimmetimde kırk guruş hakkım kalmışdır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli kezâlik inhâ etmeğin mâ-vaka‘a kayd-şüd Fî 22 min-Muharrem sene 1110 Şuhûdü’l-hâl: Eş-şâhidûnü’s-sâbikūn es-sâbikūn.