Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 103 Hüküm no: 33 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nalıncızade Attar Mustafa’nın Emine Hatun’a olan borcunun terekesinden ödenmesi Mahmiye-i İstanbul’da el-Hâc Hasan mahallesinde sâkin iken bundan akdem vefât eden Na‘lıncızâde Attâr el-Hâc Mustafa b. Mahmud b. Hasan’ın verâseti vâlidesi Saime Hatun bt. Mehmed ile sulbiye sagīre kızları Âişe ve Emine ve Safiye’ye münhasıra olduğu şer‘an zâhir oldukdan sonra müteveffâ-yı mezbûrun akrabâsından ve hâlâ menzilinde sâkine olup zâtı mahalle-i mezbûre ahâlîsinden el-Hâc Ahmed b. Derviş ve Süleyman Çelebi b. Abdullah ta‘rîfleriyle mu‘arrefe olan bâ‘isetü’l-kitâb Emine Hatun b. Ahmed meclis-i şer‘de zikr olunan sagīrelerin tesviye-i emrlerine kıbel-i şer‘den vasî nasb olunmağla tereke-i müteveffâ-yı mezbûra vaz‘-ı yed eden Attâr İbrahim Çelebi b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mustafa b. Mahmud b. Hasan’a hayâtında târîh-i kitâbdan on sene mukaddem malımdan bir def‘a bin kıt‘a esedî ve bir def‘a dahi üç yüz altmış guruş îdâ‘ ve teslîm edip ol dahi yedimden ber-vech-i muharrer ahz u kabz eyledikden sonra meblağ-ı mezbûr bin esedî ile üç yüz altmış guruşu kendi mesârifine sarfla istihlâk edip hattâ hayâtında hâl-i kemâl-i sıhhatinde meblağ-ı [mezbûr] bin esedî ve üç yüz altmış guruş vech-i meşrûh üzere cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr [10a] ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden vech-i meşrûh üzere müdde‘âsına beyyine taleb olundukda udûl-ı Müslimînden olup mahmiyede Şehremîni kurbünde Cafer Ağa mahallesi ahâlîsinden fahrü’t-tüccâr el-Hâc Abdülkerim b. Cafer ve Hoca Attâr Halil mahallesinde Ketenci Mehmed Çelebi b. Hasan ve Lütfi Paşa mahallesinde Haffâf Hüseyin Çelebi b. Mehmed li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr el-Hâc Mustafa b. Mahmud b. Hasan hayâtında hâl-i kemâl-i sıhhatinde vech-i meşrûh üzere meblağ-ı mezbûr bin esedî ve üç yüz altmış guruş cihet-i mezbûreden zimmetinde işbu müdde‘iye-i mezbûre Emine Hatun bt. Ahmed’e vâcibü’l-edâ deyni olduğunu huzûrumuzda <> ikr[âr] ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 22 min-Muharrem sene 1110 Şuhûdü’l-hâl: Ahmed Efendi b. İsmail, el-Hâc Ahmed Ağa b. Derviş, Osman Ağa b. Mehmed, el-Hâc Abdullah b. Mehmed, Hasan Çelebi b. Hızır, Ahmed Çelebi b. Mehmed, Süleyman Çelebi b. Ahmed.