Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 102 Hüküm no: 32 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Efendi’nin vasisi Mehmed Efendi’nin terekeden bazı eşyaları gizledikleri iddiası ile varislere açtığı davayı ispat edemediği İstanbul’da Güngörmez mahallesi ahâlîsinden iken bundan akdem vefât eden Ahmed Efendi b. Mustafa b. Mehmed’in verâseti zevce-i metrûkesi Emine Hatun bt. Abdullah ile sulbî kebîr oğulları el-Hâc Mustafa Efendi ve el-Hâc Mehmed Ağa ve sagīr oğlu Abdullah’a münhasıra olup lâkin müteveffâ-yı mezbûrun düyûn-ı sâbitesi terekesinden ezyed olduğuna binâen vârisleri terekesinden kasr-ı yed etmekle tesviye-i umûruna kıbel-i şer‘den vasî ve kayyım nasb olunan es-Seyyid Mehmed Çelebi b. Ahmed meclis-i şer‘-i hatîr-ı lâzımü’t-tevkīrde ashâb-ı hâze’l-kitâb merkūmûn el-Hâc Mustafa Efendi ve el-Hâc Mehmed Ağa ve zâtı ta‘rîf-i şer‘î ile mu‘arrefe olan mezbûre Emine Hatun bt. Abdullah mahzarlarında müteveffâ-yı mezbûrun dâyinlerinden el-Hâc Mehmed Ağa b. Abdullah ve Ahmed Bey b. Mustafa ve Edirne’de sâkin Yako v. İlya ve Kamal v. Mosi ve Menteş v. Kamal nâm Yahûdiler taraflarından müseccel vekîlleri İlya v. Mosi nâm Yahûdi hâzırlar iken bi’l-vesâye üzerlerine da‘vâ ve takrîr-i kelâm edip verese-i merkūmûn müteveffâ-yı mezbûr Ahmed Efendi’nin terekesinden defter-i kassâmdan hâric iki yüz elli guruş kıymetli bir samur kürkünü ve üç yüz guruş kıymetli bir cevâhir kuşağını ketm ü ihfâ edip ve defter-i kassâma idhâl etmemeleriyle suâl olunsun dedikde gıbbe’s-suâl ve’l-inkâr müdde‘î-i mezbûr es-Seyyid Mehmed’den müdde‘âsına beyyine taleb olundukda ityân-ı beyyineden ızhâr-ı acz ile istihlâf ettikde müteveffâ-yı mezbûrun terekesinden defter-i kassâmdan hâric iki yüz elli guruş kıymetli bir samur kürkünü ve üç yüz guruş kıymetli bir cevâhir kuşağını ve bi’l-cümle nukūd ve esâs-ı beytinden ismi mal ıtlâk olunur eşyâsını ketm ü ihfâ etmeyip ve üzerlerine redd ü damân lâzım gelmediğine mezbûrlara yemîn teklîf olundukda onlardan her biri dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebince vasiyy-i mezbûr bilâ-beyyine mu‘ârazadan men‘ olunup mâ-vaka‘a kayd-şüd. Fî 20 min-Muharrem sene 1110 Şuhûdü’l-hâl: Abdullah Efendi b. Ahmed, Hasan Efendi b. Musa, Halil Efendi b. Mahmud, Süleyman Efendi b. Ahmed İmâm-ı mahalle, Müezzin İbrahim b. Ahmed, Hasan Çelebi b. Abdullah, el-Hâc Abdurrahman b. Abdullah, Derviş Mehmed Ağa b. Mustafa, Mustafa Çelebi b. Hüseyin Efendi, Derviş Ahmed Ağa b. Hüseyin, Hüseyin Çelebi tâbi‘-i Yusuf, Süleyman Efendi Haffâf, el-Hâc Mehmed b. Abdullah, Abdulkadir Efendi b. Yusuf.