Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 117 Hüküm no: 35 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın vefat eden Tabib Mesud Mehmed Efendi’deki alacağının terekesinden ödenmesi Husûs-ı âti’l-beyânın mahallinde bâ-fermân-ı âlî istimâ‘ ve tahrîri içün savb-ı şer‘den Mevlânâ Mukayyid Mustafa Efendi b. Mehmed irsâl olunup ol dahi mahmiye-i İstanbul’da Mahmudpaşa hamamına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şerîf ettikde mahmiye-i mezbûrede Hocapaşa mahallesinde sâkin bâ‘isü’l-kitâb Ali Ağa b. Ömer meclis-i ma‘kūd-ı mezbûrda Molla Aşkī mahallesi ahâlîsinden olup mahrûse-i Edirne’de sâkin etibbâ-i hâssadan iken bundan akdem vefât eden Mesud Mehmed Efendi b. İbrahim b. Mustafa’nın tesviye-i umûruna kıbel-i şer‘den mansûb vekîli olmağla terekesine vaz‘-ı yed eden Abdullah Ağa b. Şa‘bân mahzarında üzerine da‘vâ ve takrîr-i kelâm edip müteveffâ-yı mezbûr Mesud Mehmed Efendi b. İbrahim b. Mustafa bin yüz yedi senesinde Mahmud Paşa Vakfı’nın mütevellîsi iken işbu hamamı âhara îcâr [murâd] ettikde âhara îcâr etmeyip iki sene bir tahvîl ile bana îcâr etmek içün bi-tarîkı’r-rüşve malımdan merkūm Mesud Mehmed Efendi’ye iki yüz guruş def‘ u teslîm ol dahi huzûr-ı Müslimînde ahz u kabz etmiş idi el-hâletü hâzihi meblağ-ı merkūmu bana dâmin olmadan fevt olmağla yed-i vasîde olan terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden Mahmudpaşa kurbünde Dâye Hatun mahallesinde sâkin Ömer Ağa b. Süleyman ve Ali Çelebi b. Abdullah li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Mesud Mehmed Efendi b. İbrahim b. Mustafa târîh-i mezkûrda vakf-ı mezbûrun [13b] mütevellîsi olup işbu hamamı âhara îcâr murâd ettikde âhara îcâr etme iki sene bir tahvîl ile bana îcâr eyle deyü bi-tarîkı’r-rüşve müdde‘î-i mezbûr Ali Ağa malından huzûrumuzda iki yüz guruş def‘ u teslîm ol dahi ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde şâhidân-ı mezbûrân sırran ve alenen ta‘dîl ve tezkiye olundukdan sonra şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli mevlânâ-yı mezbûr mahallinde istimâ‘ ve tahrîr ve ma‘an mürsel İbrahim Çelebi b. Mehmed ve el-Hâc Dilaver ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 18 min-Muharrem sene 1110 Şuhûdü’l-hâl: Murtaza Beşe b. Ahmed, Yusuf Beşe b. Mustafa, Mehmed Çelebi b. Hasan, Şa‘bân Efendi b. Yusuf, Ebubekir Beşe b. Kasım, İbrahim Çelebi b. Mehmed.