Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 123 Hüküm no: 42 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in vasisi olduğu Ahmed Efendi’ye ait cariyeyi mirasçılardan Emine Hatun’un sahiplendiği iddiasıyla açtığı davada haksız bulunduğu Mahmiye-i İstanbul’da Güngörmez mahallesi ahâlîsinden olup düyûnu terekesinden ezyed olduğu hâlde vefât [eden] Ahmed Efendi b. Mustafa’nın tesviye-i umûruna kıbel-i şer‘den vasî ve kayyım nasb olunan es-Seyyid Mehmed b. es-Seyyid Ahmed mahfil-i kazâda müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan hâfızatü’l-kitâb Emine Hatun bt. Abdullah muvâcehesinde bi’l-vesâye üzerine da‘vâ ve takrîr-i kelâm edip müteveffâ-yı mezbûrun terekesinden işbu açık kaşlı elâ gözlü orta boylu Sırfatiyyetü’l-asl Muammer nâm câriye-i memlûkesine mezbûre Emine Hatun bi-gayr-ı hakkın vaz‘-ı yed ve defter-i kassâma idhâlime mâni‘a olur suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûre Emine Hatun cevâbında işbu mevsûfe-i mezbûre Muammer benim mülk ve hakkım olup zevcim müteveffâ-yı mezbûrun kat‘â alâka ve medhali yokdur deyicek vasiyy-i mezbûrdan mevsûfe-i mezbûre müteveffâ-yı mezbûrun mülkü olduğuna beyyine taleb olundukda ityân-ı beyyineye ızhâr-ı acz ile istihlâf etmeğin mevsûfe-i merkūme Muammer mülk ve hakkı olduğuna merkūme Emine Hatun’a yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebiyle vasiyy-i mezbûr merkūme Emine Hatun ile bî-vech mu‘ârazadan men‘ olunup mâ-vaka‘a kayd-şüd. Fî 13 Muharrem sene 1110 Şuhûdü’l-hâl: Yahya Efendi b. Mustafa, Mehmed Efendi b. Mahmud, Ahmed Efendi b. Mehmed, Abdurrahim Efendi, Şeyh Mehmed Efendi, Ahmed b. Süleyman, Kara Mehmed.