Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 122 Hüküm no: 41 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin Beşe’nin vasiyetini yerine getirmek üzere Mustafa Efendi’yi vasi ve Osman Ağa’yı nazır tayin ettiği Mahmiye-i İstanbul’da Molla Hüsrev mahallesinde sâkin Şahin Beşe b. Abdullah mahfil-i kazâya gelip mahalle-i mezbûrede sâkin hâfızü’l-kitâb Mustafa Efendi b. Abdullah mahzarında takrîr-i kelâm edip bi-emrillâhi te‘âlâ mübtelâ olduğum marazdan ifâkat bulmayıp fevt olduğumda cemî‘ terekemden üç bin beş yüz akçe ifrâz olunup meblağ-ı mezbûr ile vech-i mesnûn üzere levâzım-ı techîz ve tekfîn ve iskāt-ı salâtım görüle ve bâkī kalan terekemi sen ahz u kabz edip ba‘de’l-müzâyede bey‘ ve esmânından iki Mushaf-ı şerîf ve bir sarf kitâbı ve bir Birgili (Birgivî) Risâlesi alınıp talebe-i ilmden senin re’yin ve zikri âtî Nâzır Osman Ağa ma‘rifetiyle müstahık olanlara teslîm ve fazla kalırsa mezbûr Osman Ağa’nın ma‘rifetiyle murâd eylediğin vücûh-ı birr ü hayra sarf eyle deyü vasiyet edip tenfîzine mezbûr Mustafa Efendi’yi vasî ve mahalle-i mezkûrede sâkin mezbûr Osman Ağa b. Ali Ağa’yı nâzır-ı muhtâr nasb ü ta‘yîn eyledim dedikde onlardan her biri dahi vesâyet ve nezâret-i mezbûreyi muvâcehesinde kabûl ve merâsimini edâya ta‘ahhüd etmeğin mâ-vaka‘a kayd-şüd. Fî 23 Muharrem sene 1110 Şuhûdü’l-hâl: el-Hâc Ömer b. Piyale, İvaz Beşe b. Abdullah, Mehmed Çelebi b. Muharrem, el-Hâc Ahmed b. Mustafa, Abdullah Çelebi b. Fethi, eş-Şeyh Mehmed Efendi b. Sunullah, Hüseyin Çelebi b. Mehmed, Ahmed Çelebi b. Süleyman, Mehmed Çelebi b. Hüseyin, Kara Mehmed b. Hüseyin.