Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 126 Hüküm no: 45 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Mosi’nin vefat eden Nalıncızade Mustafa’daki alacağının terekeden ödenmesi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Ahmed Efendi b. İsmail Efendi mahmiye-i İstanbul’da Yeni Câmi‘ kurbünde Attârlar sûkunda İbrahim Çelebi b. Mustafa’nın dükkânına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde Fakri(?) cemâ‘atinden olup mahrûse-i Galata muzâfâtından Ortaköy’de sâkin bâ‘isü’s-sifr Mosi v. İsak nâm Yahûdi meclis-i ma‘kūd-ı mezbûrda mahmiye-i mezbûrede el-Hâc Hasan mahallesinde bundan akdem vefât eden Na‘lıncızâde el-Hâc Mustafa b. Mahmud b. Hasan’ın evlâd-ı sıgārı Âişe ve Emine ve Safiye’nin tesviye-i emrlerine min-kıbeli’ş-şer‘ vasiyy-i mansûbları olmağla tereke-i müteveffâ-yı mezbûra vaz‘-ı yed eden mezbûr İbrahim Çelebi mahzarında üzerine da‘vâ ve takrîr-i kelâm edip müteveffâ-yı mezbûr zimmetinde vezn ve kıymeti beynimizde ilm-i şer‘î ile ma‘lûm yedimden müşterâ ve makbûz hâm şeker bahâsından ba‘de külli’l-hesâb otuz guruş ve altmış dokuz akçe hakkım olup hayâtında fevtinden üç gün mukaddem meblağ-ı mezbûr otuz guruş ve altmış dokuz akçe cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Sahhâf Süleyman mahallesinde sâkin Attârlar Kethüdâsı el-Hâc Mehmed b. Mustafa ve İbrahim Paşa mahallesinde sâkin Attâr Ali Çelebi b. Abdullah li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr hayâtında târîh-i mezbûrda meblağ-ı mezbûr otuz guruş ve altmış dokuz akçe cihet-i mezbûreden zimmetinde müdde‘î-i mesfûr Mosi v. İsak’a vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de ri‘âyet-i şerâiti’l-kabûl şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ve ba‘dehû ma‘an mürsel el-Hâc Abdullah b. Mehmed ve Hasan Çelebi b. Abdullah ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 14 Muharrem sene 1110 Şuhûdü’l-hâl: Ömer Ağa b. Hüsam, Osman Ağa b. Mehmed, Ömer Ağa b. Mehmed, Mustafa Çelebi b. Abdullah, el-Hâc Ali b. Ahmed ve gayruhum.