Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 127 Hüküm no: 46 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koston’un vefat eden Mustafa’daki alacağının terekeden ödenmesi Kezâlik akd-i meclis-i şer‘ ettikde Françe tüccârından olup mahrûse-i Galata’da Beyoğlu nâm mevzi‘de sâkin bâ‘isü’s-sifr Koston v. Hafer meclis-i ma‘kūd-ı mezbûrda mahmiye-i mezbûrede el-Hâc Hasan mahallesinde sâkin iken bundan akdem vefât eden mezbûr el-Hâc Mustafa b. Mahmud b. Hasan’ın evlâd-ı sıgārı Âişe ve Emine ve Safiye’nin tesviye-i emrlerine min-kıbeli’ş-şer‘ vasiyy-i mansûbları olmağla terekesine vaz‘-ı yed eden mezbûr İbrahim Çelebi mahzarında üzerine da‘vâ ve takrîr-i kelâm edip müteveffâ-yı mezbûr zimmetinde vezn ve kıymeti beynimizde ma‘lûm toz şeker bahâsından ba‘de külli’l-hesâb yetmiş iki guruş hakkım olup hattâ müteveffâ-yı mezbûr hayâtında fevtinden üç gün mukaddem meblağ-ı mezbûr ol kadar guruş cihet-i mezbûreden zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-ı Müslimînden mahmiye-i mezbûrede Sahhâf Süleyman mahallesinde sâkin Attârlar Kethüdâsı el-Hâc Mehmed b. Mustafa ve İbrahim Paşa mahallesinde sâkin Attâr Ali Çelebi b. Abdullah li-ecli’ş-şehâde meclis-i ma‘kūd-ı mezbûra hâzıran olup isre’l-istişhâd fi’l-hakīka müteveffâ-yı mezbûr el-Hâc Mustafa b. Mahmud hayâtında târîh-i mezbûrda meblağ-ı mezbûr yetmiş iki guruş cihet-i mezbûreden müdde‘î-i mesfûr Koston v. Hafer’e vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîf mûcebiyle ba‘de’l-hükm vâki‘ hâli kezâlik inhâ etmeğin mâ-vaka‘a kayd-şüd. Fi’t-târîhi’l-mezbûr. Şuhûdü’l-hâl: Es-sâbikūn es-sâbikūn.