Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 133 Hüküm no: 50 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hanım’ın vasiyeti gereği malının üçte birinin vasisi İbrahim’e teslim edildiği Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘den me’zûnen Mevlânâ Uşşakī Mehmed Efendi irsâl olunup ol dahi mahmiye-i İstanbul’da Haraccı Karam Mehmed mahallesinde sâkin el-Hâc Mustafa’nın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm eyledikde mezbûr el-Hâc Mustafa’nın zevce-i menkûhası olmağla menzil-i mezbûrda sâkine iken bundan akdem vefât eden Afife bint-i Receb b. Abdullah’ın vech-i âtî üzere vesâyâsını tenfîze vasiyy-i muhtârı olduğunu iddi‘â eden li-ebeveyn karındaşı fahrü’l-akrân el-Hâc İbrahim meclis-i ma‘kūd-ı mezbûrda müteveffât-ı mezbûrenin terekesine vaz‘-ı yed edip zâtı ta‘rîf-i şer‘î ile mu‘arrefe olan Saliha bt. Ali mahzarında üzerine da‘vâ ve takrîr-i kelâm edip karındaşım müteveffât-ı mezbûre Afife bt. Receb b. Abdullah hâl-i marazında bi-emrillâhi te‘âlâ fevtimden sonra sülüs-i malımdan iskāt-ı salâtım içün sarf oluna ve yetmiş beş guruş kalmış zekâtım içün verile ve es-Seyyid Mehmed Efendi ve es-Seyyid Mehmed Çelebi ve İmâm-ı sânî Molla Mehmed ve Molla Süleyman ve Molla Abdullah’dan her birine onar guruş kıymetli birer Mushaf-ı şerîf ve birer kitâb iştirâ olunup ve onar guruş dahi mezbûrlara nakd verile ve yüz guruş vâlidem mu‘takası Kâtibe’ye verile ve kırk guruşu ile zevcim üzerine lâzım olmayan levâzım-ı defnim görüle ve elli guruş ile eyyâm-ı mübârekede tabh-ı ta‘âm ve it‘âm-ı fukarâ oluna deyü vasiyet ve tenfîzine beni vasiyy-i muhtâr nasb ü ta‘yîn edip ben dahi muvâcehesinde kabûl ve musırran-aleyhâ vefât etmekle tenfîz-i vesâyâ murâd eylediğimde mezbûre Saliha Hatun mâni‘a olur suâl olunsun dedikde gıbbe’s-suâl mezbûre Saliha Hatun cevâbında tereke-i müteveffâ-yı mezbûreye vech-i muharrer üzere vaz‘-ı yedini ikrâr ve müdde‘î-i mezbûrun vech-i muharrer üzere müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden ve müteveffât-ı mezbûrenin akreb akrabâsından olup mahmiye-i mezbûrede Hamamcı Muhyiddin mahallesinde sâkin Eyüb Çelebi b. Hasan ve zevci mezbûr el-Hâc Mustafa b. Kahraman li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffât-ı mezbûre Afife bt. Receb b. Abdullah hâl-i marazında bi-emrillâhi te‘âlâ fevtimden sonra sülüs-i malımdan vech-i mezkûr üzere vasiyet ve tenfîzine işbu müdde‘î-i mezbûru vasiyy-i muhtâr nasb ü ta‘yîn edip ol dahi muvâcehesinde kabûl ve musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan İbrahim b. Mehmed ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 3 Muharrem sene 1110 [18a] [Şuhûdü’l-hâl]: el-Hâc Mehmed b. İbrahim, el-Hâc Mehmed b. Ahmed, Hüseyin Çelebi b. el-Hâc Mehmed, el-Hâc Yahya b. Ahmed, İbrahim b. Zülfikâr, Mustafa b. Abdullah, Ali Çelebi b. el-Hâc Mehmed, Mustafa Çelebi b. el-Hâc Mehmed.