Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 134 Hüküm no: 51 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Fersa’nın hür olduğunu ispat ettiği Kezâlik akd-i meclis-i şer‘-i şerîf ettikde mezbûr el-Hâc Mustafa’nın zevce-i menkûhası olup menzil-i mezkûrda sâkine iken bundan akdem vefât eden Afife bt. Receb’e rıkka-i sâbıkını mu‘terife işbu uzun boylu açık kaşlı kara gözlü Rusiyyetü’l-asl bâ‘isetü’l-kitâb Fersa bt. Abdullah meclis-i ma‘kūd-ı mezbûrda müteveffât-ı mezbûrenin vâlidesi olmağla kendüye rıkka olmak üzere vaz‘-ı yed edip zâtı ma‘rifet-i şer‘iyye ile ârifân mahmiye-i mezbûrede Hamamcı Muhyiddin mahallesinde sâkin Eyüb Çelebi b. Hasan ve el-Hâc Mustafa b. Kahraman ta‘rîfleriyle mu‘arrefe olan Saliha Hatun bt. Ali mahzarında üzerine da‘vâ ve takrîr-i kelâm edip seyyidem müteveffât-ı mezbûre Afife hâl-i marazında hasbeten lillâhi te‘âlâ mülkü iken malından beni âzâd ve i‘tâk ve kayd-ı rıkdan ıtlâk edip ve malının sülüsü fetâ kıymetimin nısfı olan elli guruşa dahi kâfî olmağla ben sâir harâir-i asliyât gibi hürre olmuş iken mezbûre Saliha Hatun rıkka olup terekeden olmak üzere bana bi-gayr-ı hakkın vaz‘-ı yed eder suâl olunup kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl mezbûre Saliha vech-i muharrer üzere mevsûfe-i mezbûreye vaz‘-ı yedini ikrâr ve vech-i meşrûh üzere müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı Müslimînden mu‘arrifân-ı mezbûrân li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffât-ı mezbûre Afife bt. Receb hâl-i marazında işbu mevsûfe-i mezbûreyi yedinde mülkü iken huzûrumuzda malından âzâd ve i‘tâk ve silk-i harâir-i asliyâta idrâc ve ilhâk edip ve malının sülüsü mevsûfe-i mezbûrenin fetâ kıymetinin nısfı olan elli guruşa vâfî ve kâfî olmağla mevsûfe-i mezbûre sâir harâir-i asliyât gibi hürre olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mevsûfe-i mezbûreden kasr-ı yedine mezbûre Saliha’ya tenbîh birle vâki‘ hâli mevlânâ-yı mezbûr kezâlik inhâ etmeğin mâ-vaka‘a kayd-şüd. Fî 3 Muharrem sene 1110 Şuhûdü’l-hâl: Es-sâbikūn es-sâbikūn.