Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 139 Hüküm no: 55 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Reisülküttab Mustafa Efendi’nin oğlu İshak Ağa’nın babasından ve kardeşinden intikal eden para ve vesikaları vasisi Şaban Efendi’den teslim aldığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen Mevlânâ Emin Mehmed Efendi b. el-merhûm Ârif Mehmed Efendi irsâl olunup ol dahi mahmiye-i İstanbul’da Akbıyık mahallesinde sâkine Hacce Saliha Hatun bt. Abdülmennan’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Ayasofya-i kebîr kurbünde Aceb Ağa mahallesinde sâkin iken bundan akdem vefât eden Reisülküttâb merhûm Mustafa Efendi b. Abdülmennan’ın kebîr oğlu fahrü’l-a‘yân İshak Ağa meclis-i ma‘kūd-ı mezbûrda hâl-i sıgārında tesviye-i umûruna vasiyy-i muhtârı olmağla mal-ı müntakiline vaz‘-ı yed eden umdetü’l-müderrisîni’l-kirâm hâfızü’l-kitâb Şa‘bân Efendi b. el-merhûm Mehmed Ağa mahzarında ikrâr ve takrîr-i kelâm edip mûmâ-ileyh Şa‘bân Efendi hâl-i sıgārımda tesviye-i umûruma vasiyy-i muhtârım olmağla babam merhûm-ı müşârün-ileyhin ve fevt olan karındaşım İsmail Ağa’nın terekelerinden işbu muhâsebe defteri nâtık olduğu üzere makbûzu olan yüz on sekiz bin dokuz yüz seksen sağ akçeyi ve hâric ez defter Vilâyet-i Rumeli’de Hatuneli kazâsında Küplüce nâm karye ve gayrıden berât-ı âlî-şân ile mutasarrıf olduğum ze‘âmetimin subaşısı Hasan Bey zimmetinde bin yüz yedi senesinden bâkī kalan kırk sekiz bin sağ akçe ile akārâtdan müctemi‘ olan on yedi bin sekiz yüz elli iki sağ akçe ki min-haysü’l-mecmû‘ altmış bin sekiz yüz elli iki akçe makbûzunun otuz bir bin dört yüz seksen akçesi ile beş aylık nafaka-i mefrûzam ve teserrî içün iştirâ eylediği câriye semeni ve işbu bin yüz dokuz senesi cebelisi masrûfu olup ve iki bin sekiz yüz altmış dört akçesi akārâtın imâreti masrûfu olmağla zimmetinde bâkī kalan otuz bir bin beş yüz sekiz sağ akçeyi yedinden tamâmen alıp kabz eyledim ve kassâm-ı sâbık Kevâkibîzâde Efendi’nin defterinde hisseme mahsûb olmak üzere alıkonulup yirmi bin akçe kıymetli altın bağlı ve bendli işbu bir altın kılıç ile üç bin dört yüz seksen akçe kıymetli altın kakma işbu bir altın devât ve iki bin dokuz yüz akçe kıymetli eşyâyı alıp kabz eyledim ve yine karındaşım müteveffâ İsmail’in terekesinden kassâm-ı sâbık Mehmed Efendi Bey imzâlı defteri mûcebince hisseme mahsûb olmak üzere alıkonulan on beş bin beş yüz akçe kıymetli eşyâyı vâlideme teslîm etmekle makbûlüm olup ve ze‘âmetime müte‘allık işbu üç kıt‘a berât ile iki kıt‘a keşif hüccetlerini ve karındaşım mezbûrun mahlûlünden bi’l-izni’ş-şer‘î benim içün yetmiş dokuz bin dört yüz yetmiş bir sağ akçe bedel-i ferâğ mukābelesinde alıverdiği akārât hisseleri makbûlüm olup sekiz kıt‘a mütevellî temessüklerini ve Acem Ağa mahallesinde vâki‘ vakıf menzilin sekiz hisseden iki yüz altmış beş guruş bedel mukābelesinde ve Osman Bey’den alıverdiği bir hisse temessüğünü ve yine benim içün kız karındaşım Emine’den seksen üç guruşa iştirâ eylediği Vilâyet-i Anadolu’da Karacaşehir kazâsına tâbi‘ İkigöl nâm karyede vâki‘ çiftlik hissesi <> mübâya‘ası hüccetini ve yine yüz otuz beş guruş ve bir sülüs guruşa vâlidem mezbûre ile Rukiye’nin çiftlik-i mezbûrdan benim ile karındaşım müteveffâya iştirâken alıverdiği hisseler mübâya‘ası hüccetini ve yirmi sekiz guruşa mezbûre Emine’den iştirâ eylediği mahmiye-i mezbûrede Balat kurbünde vâki‘ mülk bir zergerhâne mübâya‘ası hüccetini ve zikr olunan Küplüce’de vâki‘ babam müteveffâ-yı mezbûrun veresesinden yüz kırk altı guruşa iştirâ eylediği çiftlik mübâya‘ası hüccetini yedinden alıp kabz eyledim ve zikr olunan müteveffâların terekelerinden mangır râyic iken makbûzu olan kırk yedi bin iki yüz kırk sekiz mangırı dahi alıp kabz eyledim meblağ-ı mecmû‘-ı mezbûr yüz elli bin dört yüz seksen sekiz sağ akçeden vasî yedinde bir şey kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr meclisde tahrîr ba‘dehû ma‘an ba‘s olunan Ahmed b. Süleyman ve Hasan b. Mustafa ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 6 mine’l-Muharremi’l-harâm li-seneti aşer ve mi’e ve elf. Şuhûdü’l-hâl: Fahrü’l-müderrisîni’l-kirâm Murtaza Efendi b. Mehmed, fahrü’l-müderrisîn Şeyhî Mehmed Efendi b. el-merhûm Ebubekir Efendi, el-Hâc Halil Ağa b. Süleyman, Yusuf Çelebi b. Ömer, Müezzin Mustafa Çelebi b. Ali, Mehmed Efendi b. Süleyman el-İmâm, el-Hâc Mehmed b. Ahmed, Ali Ağa b. Mustafa el-Mübâşir, Hüseyin Çelebi b. Ali el-Müezzin, Osman Bey b. Habib ve gayruhum.