Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 141 Hüküm no: 56 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mahmud Çelebi’nin oğlu Ahmed Ağa babasının İlya’daki alacağının ödenmesi için oğlu Hayim’e açtığı davada sulh olduğu Husûs-ı âti’l-beyânın mahallinde tahrîri içün savb-ı şer‘de[n] bi’t-taleb irsâl olunan Mevlânâ Yahya Efendi b. el-merhûm Mustafa Efendi mahmiye-i İstanbul’da Süleymaniye mahallesinde es-Seyyid Ahmed Ağa b. el-merhûm es-Seyyid Mahmud Çelebi’nin menziline varıp zeyl-i sahîfede muharrerü’l-esâmî Müslimîn huzûrlarında akd-i meclis-i şer‘-i şerîf ettikde mezbûr es-Seyyid Ahmed Ağa asâleten ve li-ebin karındaşları es-Seyyid Hüseyin Ağa ve Şerife Zeyneb bintey el-mezbûr es-Seyyid Mahmud Çelebi b. el-Hâc Mehmed taraflarından müseccel vekîlleri olmağın vekâleten ve li-ebin kız karındaşı Şerife Râbia nâm sagīrenin vasiyy-i şer‘îsi olmağla vesâyeten meclis-i ma‘kūd-ı mezbûrda mahmiye-i Galata muzâfâtından Ortaköy’de sâkin Portukal cemâ‘atinden hâmilü’s-sifr Hayim v. İlya muvâcehesinde ikrâr ve takrîr-i kelâm edip babam merkūm es-Seyyid Mahmud Çelebi’nin merkūm Hayim’in babası olup bundan akdem hâlik olan merkūm İlya zimmetine işbu yedimde olan hüccet-i şer‘iyye nâtıka olduğu üzere eşyâ-i mütenevvi‘a bahâsından iki bin altı yüz yirmi guruş hakkı olup meblağ-ı mezbûrun iki bin elli guruşunu hüccet-i mezbûrede zahriye olunup bâkī kalan beş yüz yetmiş guruşa sen kefîl bi’l-mâl oldun deyü merkūm Hayim’den da‘vâ eylediğimde ol dahi bi’l-külliye inkâr ettikde benim husûs-ı mezbûre beyyinem olmayıp mezbûr Hayim yemîn etmek sadedinde iken husûs-ı mezbûrda sulh sagīr-i mezbûr hakkında nef‘-i mahz olmağın muslihûn tavassut edip da‘vâ-yı mezbûrumdan beni merkūm Hayim ile yüz elli guruşa sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz elli guruşu mezbûr Hayim yedinden bi’t-tamâm alıp kabz edip husûs-ı mezbûra müte‘allıka âmme-i da‘vâdan ve eymân-ı muhâsamâtdan asâleten ve vekâletim hasebiyle merkūm Hayim’in zimmetini ibrâ-i âmm-ı kâtı‘u’n-nizâ‘la ibrâ ve iskāt eyledim dedikde gıbbe’t-tasdîk merkūm Hayim dahi yine meclis-i ma‘kūd-ı mezbûrda mezbûr es-Seyyid Ahmed Ağa mahzarında ikrâr ve takrîr-i kelâm edip bâlâda mezkûr olan bedel-i sulh olan meblağ-ı mezbûr yüz elli guruşa müte‘allıka âmme-i da‘vâdan mezbûr es-Seyyid Ahmed Ağa’nın zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû İbrahim Çelebi b. Mehmed ve İbrahim b. Hasan ile meclis-i şer‘a gelip inhâ ve takrîr etmeğin mâ-vaka‘a kayd-şüd. Fî 23 min-Muharrem sene 1110 Şuhûdü’l-hâl: Mehmed Efendi b. Ali İmâm, Ahmed Efendi b. Mehmed, Ahmed Ağa b. Abdullah, Abdulkadir Çelebi b. Mehmed, İsmail Ağa b. Mehmed, Mehmed Çavuş b. Abdullah.