Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 143 Hüküm no: 59 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Duacızade Abdullah Efendi’de alacağı olduğunu ispat eden Üftade Hatun’a terekeden ödeme yapılıp rehin olan sorgucun terekeye dahil edilmesi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şerî‘at-i garrâdan irsâl olunan Mevlânâ es-Seyyid Abdullah Efendi b. İbrahim Efendi mahmiye-i İstanbul’da Hoca Üveys mahallesinde sâkin iken bundan akdem vefât eden Du‘âcızâde Abdullah Efendi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Hoca Üveys mahallesinde sâkine merhûm Seyfullah Efendi mu‘takası ve zâtı ta‘rîf-i şer‘î ile mu‘arrefe olan bâ‘isetü’l-kitâb Üftade Hatun bt. Abdullah meclis-i ma‘kūd-ı mezbûrede müteveffâ-yı mezbûrun sagīre kızı Âişe’nin tesviye-i umûruna <> vasiyy-i muhtârı olmağla terekesine vaz‘-ı yed eden Şa‘bân Çelebi b. Mehmed mahzarında üzerine da‘vâ ve takrîr-i kelâm edip müteveffâ-yı mezbûr Du‘âcızâde Abdullah Efendi b. Mustafa b. Himmet’e kendi malımdan otuz yedi guruş ikrâz ve teslîm ol dahi iktirâz ve tesellüm ve kabûl ve mesârifine sarfla istihlâk edip meblağ-ı merkūm mukābelesinde işbu mücevher sorgucunu bana vaz‘ ve teslîm edip hattâ hâl-i kemâl-i sıhhatinde huzûr-ı Müslimînde cihet-i merkūmeden ol kadar guruş deyni olduğunu ve meblağ-ı mezbûr mukābelesinde işbu mücevher sorgucunu bana rehin vaz‘ ve teslîm ettiğini [20b] huzûr-ı Müslimînde ikrâr ve işhâd edip kable’l-edâ ve’l-fek fevt olmağla yed-i vasîde olan terekesinden <> edâ ve fekk-i rehne tenbîh olunmak matlûbumdur dedikde gıbbe’s-suâl ve’l-inkâr müdde‘iye-i merkūmeden sıdk-ı makāline beyyine taleb olundukda udûl-ı Müslimînden mahalle-i mezbûrede sâkin İbrahim Çelebi b. Halil ve Sefer Çelebi b. Ali li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffâ-yı mezbûr Du‘âcızâde Abdullah Efendi b. Mustafa b. Himmet hâl-i kemâl-i sıhhatinde işbu müdde‘iye-i mezbûre Üftade Hatun bt. Abdullah’dan otuz yedi guruş iktirâz ve kabz ve mesârifine sarfla istihlâk ve meblağ-ı mezbûr mukābelesinde zikr olunan sorgucunu mezbûre Üftade’ye rehin vaz‘ ve teslîm eyledim deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hasan Çelebi b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 19 min-Muharrem sene 1110 Şuhûdü’l-hâl: Şa‘bân Efendi b. Hüseyin, Abdullah Efendi b. Abdülbaki, Ebubekir Efendi b. Mehmed, el-Hâc Abdullah b. Abdullah.